– 35 prosent av dei som køyrer med piggar betaler ikkje avgifta. Då har vi eit problem, seier Sondre Båtstrand i Miljøpartiet Dei Grøne.
Piggdekkavgifta blei innført i Bergen kommune i 2006, og inneber at alle som køyrer med piggdekk i vinterhalvåret må ha betalt for seg på førehand.
I 2015 køyrde 87 prosent av bergensarane piggfritt, men dei som framleis køyrer med piggar bidreg til svevestøvet som forureinar byen.
– Piggdekkgebyret skal ikkje berre skremme folk frå å køyre med piggar, men det skal òg finansiere feiing av gater og viktige miljøtiltak. Når pengane ikkje kjem inn og lufta er dårleg, må vi ta grep, seier Båtstrand.
- Les òg:
Må truleg ei lovendring til
No kan ny teknologi gjere det vanskelegare å snike seg unna piggdekkavgifta.
– Vi vil teste ut eit prosjekt med sensorar ved bomstasjonane som registrerer om bilane har piggar eller ikkje, seier Båtstrand.
Sensorar som kjenner att piggdekk i bomringen blir no testa av Sintef. Ifølge Teknisk Ukeblad er teknologien meir enn 99 % nøyaktig.
For å kunne ta teknologien i bruk i Bergen må det truleg ei lovendring til.
– Eigentleg skal bomstasjonane berre brukast til å krevje inn bompengar, så det krev litt hjelp frå Stortinget for å få lov til dette. Datatilsynet må òg seie ja, men dei er førebels ganske positive, seier Båtstrand.
- Les òg:
– Interessant
Klimabyråd Julie Andersland avviser heller ikkje tanken på å bytte ut piggdekkoblatet.
– Det er veldig interessant å sjå om det er mogleg å få til ei slik digital løysing. Piggdekkgebyret er ei innarbeida ordning i Bergen, men det er viktig at vi får folk til å betale når dei skal, seier Andersland.
Båtstrand frå MDG vil ta spørsmålet opp i bystyret neste veke. Andersland seier dei vil kome med eit skikkeleg svar då.
– Fram til den tid vil fagfolka våre sjå på dette. Digitale løysingar er vel verdt å vurdera, meiner Andersland.
- Les òg: