I dag skriv Dagens Næringsliv at også kommunanes eigen interesseorganisasjon, KS, vil at Stortinget skal ta initiativ til nye kommunesamanslåingar.
Navarsete ser dette i samanheng med det ho kallar «NHO sitt korstog» mot små kommunar.
– NHO starta eit korstog for samanslåing i 2003, og sidan har dei halde på. No har Civita og Høgre teke over stafettpinnen.
- Les også:
– Kanskje eller kanskje ikkje tilfeldig
Navarsete viser til at KS-leiar Sigrun Vågeng kjem frå NHO, medan KS sin styreleiar Gunn Marit Helgesen er politikar for Høgre.
– At dei tek side med NHO og Høgre i denne saka, er ikkje overraskande. Dette er ei kampanje som NHO har køyrt i mange år. No får vi sjå kva landsstyret i KS seier når dei skal diskutere denne saka i neste veke, seier Navarsete.
På spørsmål om ho trur dette er ei bevisst kampanje frå NHO- og KS-toppane, svarar Navarsete slik.
– Det kan vere heilt tilfeldig at KS for første gong går inn for kommunesamanslåing, og det kan hende det ikkje er tilfeldig. Eg veit ikkje.
KS: – Kritikken er urimeleg
Styreleiar i KS Gunn Marit Helgesen tykkjer kritikken frå Navarsete er urimeleg.
– Det er landstinget i KS som i fjor gav oss i oppdrag å greie ut kommunestrukturen, og det har vi no gjort, seier Helgesen.
– Navarsete trekkjer ei linje frå NHO sitt «korstog» mot småkommunar, til endringa som skjer i KS i dag. Kva tenkjer du om det?
– Det har ikkje Navarsete noko grunnlag for å seie. Eg møter henne stadig, og ho jobbar godt for kommunane i sin rolle. Eg arbeider for KS-medlemmane sine interesser, og det vil eg halde fram med, seier Helgesen.
Ho legg til at det ikkje er eit mål i seg sjølv for KS å redusere talet på kommunane, men å gi betre tenester.
- Les også:
Hovudstyret i KS skal handsame denne saka i neste veke.
– Det har skjedd ei erkjenning hos mange om at dersom vi skal løyse større oppgåver, som samhandlingsreforma, må ein sjå på korleis vi er organiserte. Vi må diskutere om vi i dag er organisert på best mogleg måte, seier Helgesen.