Verdsstjerna tykte det var ekkelt – heilt til ho fekk denne lyren om bord

– Det var heilt fantastisk, og eg må innrømme at ho slo meg på målstreken der, ler Ståle Jan Frøynes.

Han er elitekoordinator for Florø friidrettsfestival, og har fått verdsstjerner som Merlene Ottey, Frankie Fredericks og Lars Riedel til å konkurrere i kystbyen.

I 2004 var Inger Miller ein av verdas aller beste på 100-meter. Ho tok VM-gull så seint som i 1999, og var eitt av trekkplastera i Florø.

– Biletet av Miller gjekk verda rundt, seier Frøynes nøgd.

• Les også: Derfor kjem «Jays» tilbake år etter år

Først tykte ho det var ekkelt, men så...

Fisketuren etter stemnet har etablert seg som Florø sitt svar på jordbærpartyet til Bislett Games. Ifølgje arrangøren er den framleis ein viktig faktor for å få topputøvarar til festivalen.

Frøynes gløymer aldri opplevinga med Miller, der dei fekk kvar sin lyr på stong.

– Det byrja med at ho tykte det var ekkelt. Då vi ville ta bilete av ho saman med ein fisk, sa ho berre «æsj». Men så fekk ho fisk sjølv, og då var alt gløymt, seier han og held fram:

– Ho tok tak med begge hendene og viste fram lyren – då var ho brått blitt ein fiskeentusiast, ler elitekoordinatoren.

Meiner det er lov å håpe på rekordar

I år er dei norske sprintarane Jaysuma Saidy Ndure og Ezinne Okparaebo dei største kanonane som er klare for friidrettsfestivalen .

– Det er stort for oss at dei legg sesongopninga på norsk jord til Florø. Dei har faktisk reist til Florø for å lade opp best mogleg, seier Frøynes.

Vêrmeldingane er ikkje dei beste med tanke på sprintøvingane, med regn og noko vind. elitekoordinatoren har likevel håp om rekordløp.

– Det er lov å håpe. Jays klinte til med to løp under ti blank i fjor, og begge to har vist fin stigning i det siste. Eg trur dei er klare for store tider, seier han.

Tysdag kveld blei det klart at også tidlegare OL-sølv-vinnar Francis Obikwelu kjem til Florø for å matche Jaysuma på 100 meteren!

• Les også: Skeiv vindmålar er grunnen til at rekordløpet vert stroke

Mange norske talent på startstrek

Florø har som strategi å byggje opp stemnet rundt dei beste norske utøvarane. Laurdag skal stortalentet Karsten Warholm (19) og Florøs eigen Øyvind Strømmen Kjerpeset (23) vise seg fram for alvor denne sesongen.

Begge har norgesrekordar innan rekkevidde.

• Les også: «Det har vore litt slitsamt. Men eg håpar jo det endar bra»
• Les også: Marius satsa, men vart ikkje historisk

I tillegg stiller også dei norske medaljevinnarane frå junior-VM, Nadia Akpana Assa og Sven Martin Skagestad til start. Og i slegge har Eivind Henriksen ambisjonar om å klare VM-kravet. Arrangøren jobbar samstundes vidare med nokre fleire toppnamn.