Kald «kongeelv» gir laber fiskestart

Det var landa mellom 30 og 40 laks i Lærdalselvi på denne tida i fjor. Torsdag kveld var det rapportert inn ti landa laks på dei to døgna elva har vore open for fiske.

• Les også: Sjekk denne videoen - slik har du neppe sett laksefiske før
• Les også: Sjå videoen Kenneth tok av sverdfisken

– Vi må nok seie at det har vore ein litt forsiktig start. Det er for så vidt fangstar heilt til Bjørkum, så det er bra fordeling. Men det er vesentleg mindre enn dei første dagane i fjor, seier leiar i elveeigarlaget, Lasse Sælthun.

– Fin storleik

Sju av laksane vart landa det første døgnet. Den største på 13 kilo, ved Bjørkum kring 20 kilometer oppe i den kring 80 kilometer lange elva. Elles er fangstane spreidde nedover elva mot fjorden.

• Les også: - Endeleg min tur! Knuste familierekordane

– Det er fanga mykje mellomlaks, så det er fin storleik på laksen, seier Sælthun og meiner fire-fem varmegrader i elva er årsak til den labre starten. Då er det lite fart i fisken.

• Les også: Del dine laksebilete med oss

– Årsakene kan vere samansette, men det er ikkje ideelt for verken oppgang eller bitelysta at elva er kald. Den bit betre når elva er varmare, seier han.

Mange har mista

Elva var frå 1996 til 2013 infisert av lakseparasitten Gyrodactylus . I 2013 vart det landa 900 laks, som svarar til ein normalsesong . I fjor vart det fiska 978 laks, der halvparten var over sju kilo . Den største på kring 27 kilo.

• Les også: Her er den første laksen på 17 år
• Les også: Jublar over strålande fiskestart - tok opp 110 laksar på første veka

Elva er kjend som ei av dei beste sportsfiskarelvane i landet. Mellom anna Kong Harald, som gav elva namnet «Dronninga av lakseelvane», har ofte fiska i elva.

• Les også: Han har vore klepparen til Kong Harald, no møter han Kongen som rådmann i Lærdal

Sælthun meiner det er for tidleg å felle noko dom over laksefisket.

– Elva er grumsete, og hoppelysta til laksen er ikkje særskilt bra når det er kaldt. Så det er vanskeleg å seie kor mykje fisk som er i elva. Men eg veit at det er mista fleire laks i elva, seier han.

– Det er berre vêrgudane og innsiget som avgjer når dette snur. Eg kan ikkje våge anna enn å håpe og tru at det tek seg litt opp, seier han.