På heimearenaen Idrett møtte heile 2109 menneske opp.
Grunnen var enkel: Kristiansund kunne sikre det etterlengta opprykket frå 2. divisjon.
I 2005 rykka Kristiansund opp frå 3. divisjon. Frå 2006 til 2009 blei det, i kronologisk rekkjefølgje: 7. plass, 5. plass, 4. plass og 3. plass.
Klubben på Nordmøre har heile tida satsa hardt, og både i 2010 og 2011 var håpet på til stades.
I 2010 blei det sølvplass bak fylkesnabo Hødd, medan Bærum blei for sterke i 2011.
Men endeleg: 16. september 2012 vil stå som dagen då det endeleg gjekk vegen. 3–0 over Skeid, og opprykket til Adeccoligaen er sikra fem serierundar før slutt.
KBK-trenar Geir Bakke var i ekstase etter 3–0 over Skeid og sikra opprykksplass til 1. divisjon.
Foto: Roar Halten / NRKVille opp – uansett
Mahmoud El Haj scora 1–0 for KBK etter 27 minutt, før Christian Michelsen og Didrik Fløtre la på til 2- og 3–0 i andre omgang.
– Takk for det, takk for det, seier Kristiansund-trenar Geir Bakke då NRK gratulerer han etter kampen.
Han meiner kampen mot Skeid ikkje var årets beste, men endå ein gang var det meir enn solid nok.
– I år har vi hatt ei god samansetjing av typar, og ikkje éi einaste konflikt i gruppa. Det har vore solid heile vegen.
– Alle har vore innstilt på å jobbe for dette opprykket. To andreplassar på rad var nok, no skulle vi opp – koste kva det koste ville, fortel Bakke, som heidrar spelarane etter opprykket.
Bakke tok over som trenar før årets sesong, og har ikkje tapt éin einaste seriekamp.
Saka held fram under bildet.
Det blei emosjonelt for dagleg leiar i Kristiansund, Kjetil Thorsen. Litt tårer og litt regn, sa mannen sjølv.
Foto: Roar Halten / NRK– Det er litt tårer og litt regn
Det var både jubel, tårer og latter på «Idrett» i Kristiansund. For dagleg leiar i klubben, Kjetil Thorsen, var det heile ei salig blanding av alt.
– Det er litt tårer og litt regn. Dette er ei emosjonell stund for alle som er glad i fotball og KBK.
Med stappfullt stadion var 3-0-sigeren over Skeid ein draum som gjekk i oppfylling.
– Eg er litt mållaus. Lagmaskineriet i år har vore fantastisk.
– Og over 2000 menneske på kamp ... Det viser litt av potensialet i denne byen. Eg drøymer om slikt neste år, avsluttar Thorsen.
Saka held fram under bildet.
Jubelen stod i taket etter at opprykket var sikra. Her takkar spelarane publikum.
– Det er no det verkeleg byrjar
No skal Kristiansund verkeleg få bryne seg. Adeccoligaen er eit klart steg opp.
– Vi har heilt klart noko i 1. divisjon å gjere. Samtidig veit vi at 1. divisjon er bra, seier Bakke.
Han viser til Notodden. I fjor vann Notodden 22 kampar og hadde to tap og to uavgjort i 2. divisjon.
– No ligg dei i botnen av tabellen i 1. divisjon.
– Det blir tøffe tak. Det er no jobben verkeleg byrjar, meiner KBK-trenaren.
