Full fyr etter stjernetenning

Rett etter at stjerna vart tend, og fyrverkeriet hadde gått av, sto fjellsida på Sukkertoppen nær Ålesund sentrum i full fyr.

Fyrverkeri

Operasjonsleiar Audun Vartdal i politiet seier til NRK at etterforskinga så langt tyder på at fyrverkeriet er årsaka til brannen.

- Men arrangørane hadde tillatelse til å sende opp fyrverkeri, så dei har gjort alt heilt etter boka, seier Vartdal til NRK.

Slått stor alarm

Brannvesenet slo full alarm, men då mannskapa nådde fjellet, hadde arrangørane fått kontroll over elden.

– Vi må likevel sjekke omådet, sa brannfolka til NRK.

Og dei kunne konstatere at eit svært område, på fleire 100 kvadratmeter var svidd av.

Skulekorps avlyste

Eit heilt skulekorps med omlag 40 born og unge skulle også vore med på fjellet, men dei blei dimmitert i siste liten, på grunn av kulden og sterk vind.

Det var likevel mange, både små og store som var på Sukkertoppen då flammane brått lyste opp over byen.

Guteklubb tenner stjerne

Det er ein såkalla guteklubb eller nabogjeng, som kallar seg Real Hessa, som står bak tenninga av den fleire meter høge julestjerna.

Det har dei gjort i to år, dette var det tredje arrangementet. Men guteklubben måtte trå til sjølve då det begynte å brenne.

– Dette var ein strek i rekninga. Det må vere fyrverkeriet som har gjort at det tok fyr, sa ein av medlemmene i gutteklubben Real til NRK på brannstaden.

- Brannmannskapet berømmer gutane for innsatsen, seier operasjonsleiar Arnfinn Valderhaug ved Sunnmøre politidistrikt.

Gjekk ned med ein gong

Det var omlag 100 personar som deltok på adventsmarkeringa på Sukkertoppen.

Dei aller fleste gjekk ned igjen med ein gong det tok til å brenne. Mange vart redde, og ville kome seg ned før brannen spreidde seg enda meir.

- Dette viser vel det vi har sett før. Fyrverkeri kan lett føre til brann når det er så tørt som no, men arrangørane hadde altså fått løyve til å sende opp, og vi kan dermed ikkje klandre dei, seier operasjonsleiaren ved Sunnmøre politidistrikt, Audun Vartdal til NRK.