Guten blei ståande igjen åleine i eit par timar då resten av familien forlet hotellet laurdag formiddag. Eit heilt følgje av slektningar, mellom anna ei tante, kom i tre bilar til Grande Fjord Hotel laurdag formiddag for å få seg ein kopp kaffi. Men då det var fullt reiste dei ganske raskt vidare. Utan den seks år gamle guten.
- Vi kjem til å sende ei melding til barneveret, for slik går det ikkje an å behandle born, seier operasjonsleiar Trygve Ødegård ved Sunnmøre politidistrikt.
Leita i heile Geiranger
Personalet på hotellet sende ut fleire personar for å leite etter foreldra til guten. Men det førte ikkje fram, sjølv om dei besøkte både hotell og campingplassar i Geiranger:
- Vi fann dei ingen stad. Heller ikkje ferjene hadde sett reisefølgjet på tre bilar. Og politiet visste ingenting, seier Ola Grande ved Grande Fjord Hotel. Guten blei tatt med opp i restauranten og fekk saft, frukt og kjeks til servering. Ifølgje Grande var han roleg, og venta tålmodig på familien sin.
- Detektivarbeid
Men det var ikkje enkelt å finne familien. Ifølgje politiet er guten norsk statsborgar, men han snakka dårleg norsk:
- Guten sa sjølv at familien er pakistansk, og klarte til slutt å fortelje kva den norske mora heitte, så då ringde vi henne, seier Grande. Ho var ikkje med på turen, men var i Trøndelag, der ho bur. Til NRK seier ho at ho har snakka med guten, som var på ferie med tanter og onklar, og at han har det bra:
- Han var mest stolt over at han klarte å hugse namnet mitt, seier ho. Grande er sjokkert over at familien kunne reise frå 6-åringen. Etter eit par timar kom reisefølgje tilbake til Geiranger, og henta guten sin. Noko slikt har Grande aldri opplevd før:
- Aldri, vi er ganske sjokkerte over at nokon kan reise frå ein liten unge, seier Ola Grande.