– I dag er det rullatoren som er viktig. Det er den som er i høgsete, seier Kari Brautaset ved Spjelkavik omsorgssenter.
For fjerde året på rad, var det i dag duka for Rullatorfestival hjå Spjelkavik omsorgssenter.
Heia fram av publikum, utstyrt med rullator eller rullestol, var det lite som kunne stoppe deltakarane i det dei rulla seg gjennom løypa.
PUBLIKUM: Deltakerane blei heia fram av dei frammøtte, blant anna ein barnehage.
Foto: Silje Bjerknes / NRK– Om du ikkje brukar rullator til vanleg tek vi den med ut i dag og går ein tur, held ho fram.
Aktiv og sosial
Stemninga var god, og latteren sat laust under dagens arrangement i Spjelkavik. Arrangørane kunne by på ei variert løype, med fleire aktivitetar.
Deltakarane kunne prøve seg på quiz, kaste risposar på boks, kaste ringar, tut og drikk og songoppgåver.
KLEDD SEG UT: Både deltakarane og dei tilsette hadde pynta seg for anledninga. Frå venstre Anita Tennøy Brekke og Kari Brautaset.
Foto: Silje Bjerknes / NRKMen det var det ikkje konkurransen som var i fokus under dagens arrangement.
– Det viktigaste er at alle kan vere med og delta. At dei kjem seg ut i frisk luft, samtidig som dei får mosjon, seier Brautaset.
Arrangementet prøvar å dekke fleire aktivitetar.
– Vi prøvar å gjere det til ein sosial aktivitet, der deltakarane kan testa seg fysisk i tillegg til at dei får trena hjernemuskelaturen sin, held ho fram.
Kollega Anita Tennøy Brekke var samd.
– Vi prøvar å gjere det kjekt for deltakarane. Det at du brukar rullator eller rullestol er inga hindring for fysisk aktivitet, og det er det vi prøvar å vise her i dag, seier Brekke.
- LES OGSÅ:
- LES OGSÅ:
Pynta både seg sjølv og rullatoren
Deltakarane kunne vinne premie for blant anna finast pynta rullator, finaste rullestol og beste antrekk. Fleire av deltakarane hadde pynta seg sjølv og transportmidla i håp om å vinne premiar.
Blant dei mange deltakarane var Bjørg Dmuchowski.
AAFK: Bjørg Dmuchowski hadde pynta seg sjølv å rullatoren i AAFK stil.
Foto: Silje Bjerknes / NRK– Dette er veldig morosamt.
Ho hadde valt eit lokalt design då ho pynta rullatoren. Eit kålhovud pynta med AAFK lue og sjef, blinklys og lommelykt pryda rullatoren.
I tillegg hadde ho utstyrt seg med appelsin og kvikklunsj, som niste på løypa.
Sjølv er Dmuchowski svaksynt. Ho tykkjer slike arrangement er viktige.
– Du kjem deg ut, samtidig som det er sosialt. Det er ikkje alltid så lett for oss som er handikappa å vere med på alt mogleg, så dette er veldig kjekt.
