I den vesle bygda Kråkenes i Kinn kommune, med utsikt mot storhavet og Stad, står ein einsleg mobiltelefon i vindaugekarmen.
Det er stort sett her han står.
Dette er nemleg den einaste plassen i huset at mobilen til Solbjørg Teige har dekning.
– Eg må sitje på ein stol framfor glaset når eg skal prate, seier ho.
Allereie i august var ho «trøytt og lei».
Og i september vart det enda verre. Då mista dei fasttelefonen.
Den forsvann fordi Telenor fasar ut koparnettet. Innan 2022 skal det vere vekke i hele landet.
Det har skapt bekymring i distrikta. For det kan ta lang tid før eit fibernett er på plass.
Om det kjem i det heile tatt.
NRK har tidlegare skrive om bygda Festvåg nord for Bodø, der innbyggarane kjemper for ikkje å måtte stå att heilt utan nett.
UT MOT HAVET: Heilt yst i vest, med utsikt mot storhavet og Stad, finn vi den vesle bygda Kråkenes. Her kan dei ikkje setje si lit til mobildekninga.
Foto: Privat– Fjella skuggar for signala
– Stad er eit stort og geografisk komplisert område, seier Bjørn Amundsen, som er dekningsdirektør i Telenor.
Ikkje så ulikt heile regionen, som er Sogn og Fjordane.
– Dei har vakre fjell som er fine å sjå på, men dei skuggar for signala, seier Amundsen.
Per i dag er 13–14 prosent av flatearealet i Noreg utan mobildekning. Typiske stader er brear, vidder og inst i tronge fjordarmar. Altså plassar der det ikkje bur folk.
Nesten.
Ifølgje analyseselskapet Tutela er 1,41 prosent av folk i Noreg utan forbindelse.
Dei meiner likevel at Noreg er best i verda på mobildekning.
– Det er praktisk talt umogleg å dekke kvar einaste kvadratmeter av eit land. 5G-implementering vil vere ein del av løysinga, og signalhulla innandørs vil i aukande grad bli laust hjelp av dedikerte antennesystem og tilgang til WiFi-nettverk, seier Chris Mills, analytikar hos Tutela Technologies til ITavisen.
– Vanskeleg å dekke opp ytterkantane
I slutten av oktober viste Telenor fram sine 5G-planar og lovde «full nasjonal dekning» innan utgangen av 2024. Telia høgna bodet, og lovde det same innan utgangen av 2023.
Begge skal investere milliardbeløp i utbygginga av 5G dei kommande åra, og oppgraderer 4G-netta samtidig.
Det gjev håp til ordførar i Kinn, Ola Teigen (Ap), som tysdag var på synfaring i Kråkenes.
Det er likevel mykje som står att, seier han:
– Det er særleg vanskeleg å dekke opp alle ytterkantane i kommunen. For å dekke Kråkenes sine åtte husstandar må vi ut med om lag 2 millionar kroner. Då er det framleis 692 husstandar i kommunen som manglar dekning.
SKUGGAR FOR: Sogn og Fjordane har vakre fjell som er fine å sjå på, men dei skuggar for signala, seier Bjørn Amundsen, som er dekningsdirektør i Telenor.
Foto: Tale Hauso / NRK– Inga mobildekning der eg fann henne
Ein båttur sørover ligg Svanøy, som ligg i same kommune.
Her driv Johan Trygve Solheim Norsk Hjortesenter. Den dårlege dekninga skaper konstant vanskar i drifta, men det mest dramatiske opplevde han på privaten.
Det var den dagen kona fekk massiv hjernebløding.
– Der eg fann henne var det inga mobildekning, fortel han.
Han måtte skunde seg tilbake til hjortesenteret for å ringe naudnummeret, og til alt hell gjekk det bra.
No gleder han seg over lovnaden om at innbyggjarane skal få ein ny mobilmast innan to-tre år.
– Det har med tryggleik å gjere, seier han.
REDDA: Johan Trygve Solheim vart redda av telefonen på jobb då kona fekk massiv hjernebløding på ein stad utan telefondekning.
Foto: privat