Regjeringa gir meir pengar til brubygging

Kommunal- og distriktsdepartementet gav tysdag beskjed til Vestland fylkeskommune om at Atløysambandet vil få «om lag» 17,7 millionar kroner i årlege ferjeavløysingsmidlar i 45 år.

Det same sambandet låg tidlegare an til å få 11 millionar kroner i tilsvarande støtte.

Tanken bak ferjeavløysingsmiddel er at staten har interesse av å hjelpe fylka med bruprosjekt framfor å sponse dei med ferje-pengar til «evig tid» (sjå faktaboks).

«Regjeringa prioriterer folk langs kysten», skriv departementet i ei pressemelding.

– Håpar det er ein skrivefeil

Jubelen stod i taket då kommunalminister Jan Tore Sanner presenterte ideen om ferjeavløysingsmiddel i 2015.

Men for to år sidan vart det rabalder fleire stader langs kysten då ein ny utrekningsmåte vart lagt til grunn.

Nokre bruprosjekt kom betre ut i den nye modellen, medan øyfolket på Atløy gjekk frå eit løfte på 27,8 millionar kroner i årlege ferjeavløysingsmiddel – til 11 millionar kroner.

– Håpar det er ein skrivefeil, kvitterte fylkestingsrepresentant for Frp, Frank Willy Djuvik.

I dag gler han seg over den siste omdreiinga i saka, men minner om at det framleis er langt opp til dei 27 millionane som først vart førespegla.

– Atløysambandet er eit så bra prosjekt, at det truleg kan realiserast med 17,7 millionar i året, men det vil gå noko lenger tid å betale det ned, seier han.

– Det er eit godt tal

I Askvoll blir nyheita om prosjektet, som fekk sin første reguleringsplan i 1989, godt motteke.

– Det er eit godt tal. Etter å ha rekna på det raskt trur eg både renter og avdrag er innbetalt før 45 år er gått, seier Ole Andre Klausen (H), som er ordførar i kommunen.

Bjørn Arne Mjåseth, ein av 450 innbyggarar som bur på øya Atløy, er litt meir atterhaldsam:

– Det er positive signal frå Statsråden, men dette dekkar på langt nær dei faktiske kostnadene fylket har med ferjedrifta, seier han.

– Med dette ligg alt til rette for at fylkeskommunen kan realisere brua, seier Aril Magne Olset.

Justeringa av ferjeavløysingsmidlane kjem i forlenginga av kommuneproposisjonen for 2023, som i mai vart lagt fram saman med revidert statsbudsjett.

Det har likevel teke tid å finne ut akkurat kva justeringa inneber, ettersom delar av sambanda vart gratis i andre halvdel av 2022.

– Dette er ei særs gledeleg melding

I fjor stemde fylkestinget i Vestlandet ja til å sende søknad om ferjeavløysingsmidlar for Atløysambandet til Kommunal- og distriktsdepartementet.

Med dagens nyheit er fylket klart for neste steg, varslar fylkesordførar Jon Askeland (Sp).

– Dette er ei særs gledeleg melding for oss! Me har jobba så lenge med å gje folket på Atløy bru, reguleringsplan er godkjend, men økonomien har vore bøygen.

Han legg til:

– No vil eg gje fylkesadministrasjonen melding om å rekna på nytt og leggja fram sak snaraste råd.