Ein sjukepleiar, ein redningsmann, to pilotar og to andre var om bord i helikopteret som styrta i sjøen vest for Sotra onsdag kveld. Reidun Hestetun omkom.
Onsdag kveld styrta eit helikopter på øvingstur i sjøen vest for Sotra i Vestland.
Seks personar var om bord i helikopteret.
Reidun Hestetun (61) er stadfesta omkomen.
Ein mann er alvorleg skadd, men ikkje lenger kritisk skadd.
To menn er lettare skadde.
To menn er skrivne ut frå sjukehuset.
Alle dei seks blei sende til Haukeland universitetssjukehus i Bergen etter at dei blei heisa opp frå sjøen.
– Dette er ein tung dag for alle som jobbar på norsk sokkel, sa konsernsjef i Equinor, Anders Opedal på torsdag.
Jobba som sjukepleiar
Reidun Hestetun var tilsett i Equinor. Der jobba ho som sjukepleiar.
– Den omkomne var sjukepleiar som har vore tilsett hjå oss i fleire tiår. Me har mista ein veldig respektert og kjær kollega som var utruleg dedikert i arbeidet sitt for å vareta andre sin tryggleik, sa ein prega Opedal utanfor pårørandesenteret torsdag.
Hestetun blei 61 år gamal. I 2018 vart ho intervjua av magasinet Sykepleien.
– Eg likar jobben min godt. Det beste er folka og den store variasjonen i arbeidsoppgåvene. Ved sidan av å vera trygg på akuttmedisin, må me vera sjølvstendige og kunna meistra stress, sa Hestetun då.
Medisinske vurderingar og drivstoffmangel gjorde at redningshelikopteret som kom først til staden returnerte til fastlandet då dei fem første var heisa opp frå sjøen.
25 minutt seinare kom det neste helikopteret fram til ulukkesstaden og fekk heisa opp Hestetetun.
Dedikert, ærleg, roleg, raus og omsorgsfull
Opphaveleg kom Hestetun frå Årdal i Indre Sogn, men ho budde no i Bergen kommune.
– Det var ein frykteleg beskjed å høyra om ulukka i seg sjølv, og no har me også fått beskjed om at den omkomne personen opphaveleg er frå Årdal og har familie her. Våre tankar og djupaste medkjensle går til dei pårørande og etterlatne, seier ordførar i Årdal kommune, Christian Sønstlien.
Kommunen har vore i kontakt med dei pårørande og yter den bistanden som dei ønskjer og treng.
– Dette er den verst tenkelege beskjeden å få som ordførar.
Anne Gine Hestetun, tidlegare fylkesordførar i Hordaland, var nær veninne med Reidun Hestetun. Ho skildrar veninna som dedikert, ærleg, roleg, raus og omsorgsfull.
– Me har følgt kvarandre i tjukt og tynt, heilt frå «to hus tett i tett» heime i Årdal på tidleg 60-talet, til våre siste kaffikoppar på fredag, seier ho, og fortel at Reidun Hestetun var hennar store støtte gjennom årevis med kreftbehandling.
– Saknet er endelaust.
Redningsmann blant dei skadde
Fire av dei overlevande bur i Noreg, høvesvis i Mo i Rana, Moss, Oslo og Sandnes. Den siste av dei overlevande bur i utlandet.
Ein redningsmann i 50-åra er ein av dei skadde. Han er tilsett i selskapet Bristow og har jobba som redningsmann store delar av livet.
Kona hans var heime då ho høyrte om ulukka.
Ho ringte umiddelbart til ein kollega som stadfesta at mannen hennar var om bord i helikopteret.
To timar seinare fekk ho ein telefon frå sjukehuset som stadfesta at han var i live.
– Eg har tru på at dette går bra, seier ho til Sarpsborg Arbeiderblad.
Dei fem skadde mennene er alle tilsette i selskapet Bristow. To av dei er pilotar.
– Sorga pregar oss alle, seier direktør i Bristow Norge Heidi Wulff Heimark til NTB.
Heimark stadfestar at dei fem torsdag blei varetekne på Haukeland sjukehus. Fredag er to av dei skrivne ut.
Då ulukka skjedde var helikopteret på jobb for Equinor.
– Dette er ei djupt tragisk hending. I dag er ein tung dag for mange. Våre tankar går til dei familiane, nære og andre som er råka, sa konsernsjef Opedal torsdag.
Då naudetatane blei varsla, vart beredskapsnivået på Haukeland sett til gult nivå. Dei stadfesta onsdag morgon at dei var tilbake i normal drift.
– Beredskapsnivået til Haukeland er igjen i vanleg drift. Dei skadde får god og adekvat behandling, seier kommunikasjonssjef ved Haukeland, Erik Vigander.
Politiet stadfesta ved 01-tida natt til onsdag at dei hadde gjort forsøk på å avhøyra dei skadde. Torsdag formiddag hadde dei framleis ikkje blitt avhøyrde, på grunn av helsetilstanden.
– Politiet har til no gjennomført avhøyr av to av dei som var om bord i helikopteret. Me kan ikkje gå inn på kva dei har forklart på dette tidspunktet, skriv politioverbetjent Helle Soltvedt i ei pressemelding ved 11-tida fredag.
Politiet har tidlegare omtalt ulukka som ei stor påkjenning for dei som var om bord. Alle seks hadde på seg overlevingsdrakt då ulukka skjedde.
Tidslinje: Helikopterstyrten vest for Sotra
Slik gjekk det med helikopteret som styrta vest for Sotra i Vestland. Dei nyaste oppdateringane er nedst i tidslinja. Fleire av tidspunkta er henta frå Hovudredningssentralen (HRS).
Slik var ruta til helikopteret
Kartet viser kor helikopteret flaug før det styrta. Helikopteret tok av ved Bergen luftham, Flesland. Vidare flaug helikopteret vestover og opp Hjeltfjorden før det flaug sørover og styrta vest for Sotra.
Under kartet startar tidslinja for helikopterstyrten.
Kl. 18.24, 28.02.24
Helikopteret tek av
Helikopteret tek av frå Bergen lufthamn, Flesland.
Kl. 19.30, 28.02.24
Avsluttar øving
Helikopteret avsluttar ei øving med eit skip frå Wilson Shipping på oppdrag for Equinor. Helikopteret flyr mot vest.
Kl. 19.38, 28.02.24
Helikopteret mistar radarkontakt
Helikopteret mistar truleg radarkontat, ifølgje Aircraftregister.net.
Kl. 19.41, 28.02.24
Personleg nødpeilesendar utløyst
Helikopteret treffer vatnet og ein nødpeilesendar blir aktivert.
HRS får inn ei melding om at ein nødpeilesendar er utløyst og redningsleiarane på vakt går i gang med å sjekka nærare kva for ei maskin det er som sender signalet og prøver å få kontakt.
HRS får beskjed om at ein personleg nødpeilesendar, av typen helikoptermannskap i eit redningshelikopter har på seg, er utløyst. Posisjonen til denne er i same område som nødpeilesendaren til helikopteret.
Avinor, ACC og tårnet på Flesland blir kontakta.
Kl. 19.44, 29.02.24
Avinor prøver å få kontakt
HRS får stadefesta at det er eit av redningshelikoptera frå Bristow, og at dei har vore ute på treningstur.
HRS ber flygeleiar i Avinor sjekke om dei får kontakt med helikopteret. Tre minutt etter får dei tilbakemelding om at dei ikkje oppnår kontakt over radio.
Kl. 19.52-20.05, 28.02.24
HRS trykkjer på den store, raude kanppen
Redningshelikopteret Sola, som allereie er i lufta på trening, blir sendt i retninga nødsignalet indikerer. HRS alarmerer redningshelikopteret i Florø.
Dei ber i tillegg Kystradio om å senda «mayday relay» til fartøy i området. KV Sortland stadfestar at dei set kurs mot området.
Det blir avtalt at eit loshelikopter frå Flesland kan gå mot området. Også ambulansebåten Austevolljenta blir bedt om å gå mot området.
Klokka 20.03 melder redningshelikopteret Sola at dei er omlag 15 minutt frå posisjonen.
HRS ber Kystradio om å kalle ut redningsskøyter frå Redningsselskapet. Det er snakk om Bjarne Kyrkjebø og Kristian Gerhard Jensen II.
Kl. 20.06, 28.02.24
HRS: Seks personar om bord
Hovudredningssentralen får opplyst at det er seks personar om bord.
Kl. 20.11, 28.02.24
Politiet får melding
Politiet får melding om helikopterstyrt vest for Sotra.
Kl. 20.25, 28.02.24
Observerer folk i sjøen
Redningshelikopteret Sola observerer folk i sjøen og startar prosessen med å heisa dei opp.
Rundt kl. 20.30, 28.02.24
Kommunen får melding
Øygarden kommune får melding om helikopterstyrten. Dei set krisestab.
Personar blir observerte i sjøen og oppheising startar.
Personane skal ha lege i sjøen i 45-50 minutt.
Kl. 20.37, 28.02.24
Ser ikkje helikopteret
Redningshelikopteret Sola melder at dei ikkje ser sjølve helikopteret som har styrta.
Kl. 20.51, 28.02.24
På veg med fem personar
Redningshelikopteret Sola melder at dei er på veg til Haukeland sjukehus med fem personar om bord. Grunnen til at dei må dra mot Haukeland er at dei ikkje har nok drivstoff til å vera i området.
HRS veit at dei allereie har redningshelikopter Florø på veg mot søksområdet.
Det er også ein luftambulanse i området som indikerer lokasjonen til den siste personen.
Kl. 20.53, 28.02.24
Politiet stadfestar ulukka
Politiet stadfestar at det har skjedd ei luftfartsulukke i sjøen vest for Sotra i Vestland.
Rundt kl. 21, 28.02.24
Redningshelikopter landar på Haukeland
Redningshelikopteret, med dei fem første personane som blei henta opp frå sjøen, landar på Haukeland universitetssjukehus i Bergen.
Kl. 21.11, 28.02.24
Funn av siste person
Redningshelikopteret Florø stadfestar funn av siste person. Fem minutt seinare stadfestar dei at dei har ein person om bord og reiser mot Haukeland.
Det er rundt 25 minutt frå helikopteret Sola drog til siste person er om bord i redningshelikopteret Sola.
Rundt kl. 21.15, 28.02.24
Havarikommisjonen bemannar opp
Havarikommisjonen er i gang med å bemanna opp.
Rundt kl. 21.25, 28.02.24
Sjukehuset stadfestar at dei har tatt imot seks personar
Haukeland universitetssjukehushar tatt imot seks personar. Tilstanden er uavklart.
Kl. 21.50, 28.02.24
Redningsaksjonen er over
Redningsaksjonen er avslutta.
Rundt kl. 22.00, 28.02.24
Mottak for pårørande
Politiet opprettar mottak for pårørande. Redningsskøyta har begynt å finna vrakdelar. Dei søker etter fleire delar.
Kl. 00.30, 29.02.24
Ein person død
Politiet stadfestar at ein person er død. Ein annan er lettare skadd, medan dei fire andre har varierande skadegrad.
Kl. 06.41, 29.02.24
Politiet seier det har føregått søk
Politiet seier torsdag morgon at det har blitt gjennomført søk gjennom natta etter helikopteret som havarerte.
Kl. 07.49, 29.02.24
Havarikommisjonen startar arbeidet
Statens havarikommisjon for luftfart startar arbeidet etter helikopterulukka. Målet er å finna hovuddelen av vraket og deretter få det heva.
Kl. 09.10, 29.02.24
Ein kritisk skadd
Haukeland universitetssjukehus opplyser at ein person er kritisk skadd, ein alvorleg skadd og tre lettare skadde.
Kl. 10.45, 29.02.24
Trur helikopteret ligg på 300 meters djup
Leiar for States havarikommisjon for luftfart seier at dei trur at vraket ligg på 300 meters djup.
Kl. 11.46, 29.02.24
Kvinne i 60-åra mista livet
Vest politidistrikt opplyser at det var ei kvinne i 60-åra, tilsett i Equinor, som omkom i ulykka. Dei andre fem i helikopteret var tilsette i Bristow.
Rundt 12, 29.02.24
Alle flygingar innstilte
Alle helikopterflygingar til og frå heliportar er innstilte fram til klokka 18.
ConocoPhillips-flygingar er innstilte inntil vidare. Det er også flygingane for Aker BP.
12-tida, 29.02.24
Sjukepleiar på jobb
Konsernsjefen i Equinor opplyser at den omkomne kvinna var sjukepleiar på jobb for å vareta andre.
Kl. 13.08, 29.02.24
Hadde overlevingsdrakt
Dei seks personane som var om bord på helikopteret hadde på seg overlevingsdrakt, seier politiet.
Rundt kl. 13.15, 29.02.24
Svart boks-håp
Politiet seier dei trur på at ferdsskrivaren, også kalla «den svarte boksen», på helikopteret vil bli funnen, men at jobben er utfordrande på grunn av høge bølger og sterk vind.
Kl. 16.35, 29.02.24
Ber om grundig granskning
Energiminister Terje Aasland (Ap) sender sine tankar til dei ramma etter helikopterulykka. Samstundes ber han om ei grundig gransking av ulykka.
Kl. 17.17, 29.02.24
Avventar helikoptertransport til fredag
Equinor stansar alle helikopterflygingar til fredag klokka 10 etter ulukka utanfor Bergen.
Det opplyser informasjonsdirektør Sissel Rinde til NTB.
Kl. 18.00, 29.02.24.
Politiet har gjennomført to avhøyr
Ifølgje VG har politiet avhøyrt to av dei som var om bord i helikopteret.
– Vi har gjennomført to avhøyr og planlegg fleire i morgon, seier stabssjef Gustav Landro i Vest politidistrikt til VG.
Rundt kl. 19, 29.02.24
På veg til Haakonsvern med vrakdelar
Kystvaktskipet som bidrog i søket etter vrakdelar er på veg inn til Haakonsvern utanfor Bergen med delar dei har funne i sjøen.
Det er stabssjef Gustav Landro i Vest politidistrikt som fortel dette til TV 2.
Kystvakta skal på dette tidspunktet ikkje vera heilt sikre på kva slags delar dei har med seg, men dei tar det med inn til land. Her vil delane bli overleverte til politiet.
Kl. 08.30, 01.03.24
Ingen lenger kritisk skadde
Haukeland universitetssjukehus sender ut ei oppdatering om korleis det går med dei skadde. Fredag morgon er to personar skrivne ut frå sjukehuset, to er lettare skadde, medan ein person er alvorleg skadd, men stabil.
Rundt kl. 08.30, 01.03.24
Forsvaret ikkje lenger delaktig i søk
Kystvakta er ikkje lenger oppmoda om å bistå frå politiet, og er derfor ikkje lenger i aksjon i søket etter vrakrestar frå helikopteret som styrta utanfor Sotra onsdag kveld.
Kl. 08.41, 01.03.24
Funn av rotorblad og helikopterdør
Politiadvokat Trygve Ritland i Vest politidistrikt stadfestar til TV 2 at det er funne vrakrestar frå helikopteret, eit rotorblad og ei dør.
Kl. 09.00, 01.03.24
Equinor skaffar 15 nye helikopter
Gjennom avtalar med helikopterprodusentane Bell og Leonardo, sikrar Equinor 15 nye helikopter til passasjertrafikk på norsk sokkel. Helikoptera er av typen Bell 525 og AW189.
Kl. 10.30, 01.03.24
Ingen helikopterflygingar før klokka 12 fredag
Det er eit opphald i flygingar fram mot klokka 12 fredag. Det framgår i meldingar frå Equinor og ConocoPhillips på nettstaden Heliport.
Kl. 10.47, 01.03.24
Reidun Hestetun (61) omkom i ulykka
– Vi har mista ein veldig respektert og kjær kollega som var utruleg dedikert i arbeidet sitt for å vareta andre sin tryggleik, sa Equinor-sjef Anders Opedal i går. Fredag blir det stadfesta at det var sjukepleiaren Reidun Hestetun som omkom.
Kl. 10.49, 01.03.24
Equinor opptar helikoptertrafikk
Equinor stadfestar at dei startar opp att helikopterflygingar på norsk sokkel fredag.
Kl. 11.23, 01.03.24
Har leigd inn offshoreskip
Havarikommisjonen har leigd inn eit offshoreskip for å halda fram med søk og deretter heving av vrakrestar. Det skrive Havarikommisjonen på deira nettsider.
Kl. 11.42, 01.03.24
Første helikopter lettar
Det har vore stans i helikoptertrafikken på norsk sokkel sidan onsdag kveld.
Equinor skriv i ei pressemlding at dei har gjort avklaringar med myndigheitene og fagmiljøa for flytryggleik, slik at ein kan starta flygingar att på ein trygg måte.
Litt før klokka 12 fredag letta det første Sikorsky S-92-helikopteret etter ulukka.
Kl. 12.42, 01.03.24
Håp om å heva vraket i helga
Havarikommisjonen har leigd inn skipet Normand Ocean for å både leita etter helikopteret og få heva det i løpet av helga. – Vi har håp om å få gjort dette i løpet av helga. Men det er avhengig av vêret, seier leiar for luftfart i havarikommisjonen, Kåre Halvorsen.
02.03.24
Vraket blir heva
Tidleg laurdag morgon blir vraket av helikopteret funne på 220 meters djup. På andre forsøk blir det heva og frakta til Haakonsvern som er Sjøforsvaret sin base i Bergen.
02.03.24
Sender den «svarte boksen» til England
Laurdag morgon får NRK stadfesta at ferdsskrivaren med lydopptak, også kjent som den «svarte boksen» er funnen.
– Ferdsskrivaren vil vi omgåande ta med oss til eit laboratorium i England, saman med ein representant fra produsenten Sikorsky, seier Kåre Halvorsen i Havarikommisjonen.
Føremiddag, 02.03.24
Fire av fem er avhøyrde
Arne Lutro, kommunikasjonssjef i Vest politidistrikt, opplyser laurdag føremiddag at fire av dei fem overlevande er avhøyrde.
– Ingen har status som mistenkt eller sikta, seier han, og opplyser at politiet også ønskjer å avhøyra den femte personen.
Kveld, 02.03.24
Ein tredje person er utskriven
Laurdag kveld stadfestar Bristow, arbeidsgivaren til dei fem skadde mennene, at ein tredje person er skriven ut frå sjukehus.
Kl. 12.20, 04.03.24
Havarikommisjonen: Flyteelement løyste seg ikkje ut
Måndag har Havarikommisjonen ein pressekonferanse på Haakonsvern, der dei fortel om nokre av funna dei har gjort. Der kjem det fram at helikopteret sine flyteelement ikkje blei automatisk utløyste.
– Vi veit ikkje kvifor flyteelementa ikkje har kome ut. Det er ein av tinga me skal sjå nærare på, seier Kåre Halvorsen i Havarikommisjonen. Han håpar ferdsskrivaren vil ha informasjon om flyteelementa. I tillegg peikar Havarikommisjonen på at helikopteret er nokså inntakt.
– Det er openbart eit overlevbart samanstøyt, sjølv om ikkje alle gjorde det. Energien i seg sjølv under samanstøyten var ikkje problemet, seier Halvorsen.
Kl. 14.15, 04.03.24
HRS frigir nye detaljar
Det blir kjent at den omkomne Reidun Hestetun var den siste personen som blei henta opp av vatnet. Medan dei fem overlevande vart henta av eit helikopter frå Sola, blei ho plukka opp av eit helikopter frå Florø. Dette kom til staden rundt 25 minutt seinare. Det var medisinske vurderingar og drivstoffmangel som bidrog til at det første helikopteret måtte returnera til fastlandet før den sjette personen var redda opp. Det er ikkje kjent korleis helsetilstanden til den sjette personen blei vurdert på det tidspunktet.
Kl. 10.00, 05.03.24
Data henta ut frå ferdsskrivaren
Havarikommisjonen skriv på sine nettsider at data er henta ut frå ferdsskrivaren, og at jobben med å analysera dataa er i gang. Det er venta at arbeidet vil ta lang tid, melder dei.
06.03.24
Femte person framleis ikkje avhøyrt
Ei veke etter helikopterhavariet er den femte og siste av dei overlevande framleis ikkje avhøyrt, seier politiet til NRK. Ingen er sikta eller mistenkte i saka.
– Det må vera lov å vera bekymra
Tom Georg Indrevik er ordførar i Øygarden kommune, der helikopteret styrta.
– Hugs at alle her ute, og langs store deler av kysten av Noreg, kjenner nokon eller er i familie med nokon som faktisk jobbar i olje- og gassindustrien. Det er klart at når slike hendingar som i går skjer, så er det ei ekstra belastning kvar gong dei skal reisa offshore.
Det er ikkje første gang det har vore helikopterulukke i kommunen. I 2016 omkom 13 personar då eit helikopter styrta ved Turøy.
Kommunen er ein av mange norske kystkommunar der olje- og gassindustrien er ein stor og viktig arbeidsplass.
– Eg håpar, som eg har sagt i andre samanhengar i dag òg, at ein stiller opp for kvarandre, og at det må vera lov å vera bekymra og til og med faktisk litt redd ein periode no.