Servicebåten «Godfisken» køyrer dagleg til ulike oppdrettsanlegg langs kysten.
I fjor haust vart det dramatisk.
I løpet av få veker vart skipper Marius Strømmen kalla ut til tre ulike redningsoppdrag, fordi han var i nærleiken alle gongane.
– Du er ikkje så tøff i trynet når du ligg i sjøen og treng hjelp. Tida kan vere avgjerande.
Alle hendingane var utfordrande på ulike måtar.
- I august i fjor fekk ei Colin Archer-skøyte maskinstans og dreiv mot land ved Ryvarden.
- I oktober kantra ein fritidsbåt i dårleg ver ved Måløy. Fiskaren sat på kjølen i fem timar før han vart redda.
- I november hamna ein bil med to personar i sjøen i Kalvåg. Ein person omkom.
Ved ulykka i Måløy vart servicebåten viktig, ettersom den har store kraner som kan utføre tunge løft.
– Når vi er på sjøen, hjelper vi kvarandre. Om det er fritidsbåt, yrkesfiskar eller lastebåt, seier skipperen.
Vil ha fleire i register
Redningsleiar ved Hovudredningssentralen Sør-Noreg, Andreas Bull, seier fleire som jobbar langs kysten bør stille seg tilgjengeleg for redningsoppdrag.
Han trekker fram oppdrettsnæringa som døme.
– Oppdrettsnæringa har veldig gode båtar. Dei kan slepe, dei har kran og pumper om bord. Dei ligg spreidd langs heile kysten og kan ofte vere først på staden. Då er det viktig å kunne kome raskt i kontakt med dei.
Når oppkallinga skjer over skipsradioen, har dei som høyrer og oppheld seg i nærleiken plikt til å hjelpe.
Problemet oppstår når båtar som ligg langs land ikkje får med seg kva som blir sagt.
Men mange sivile båtar er ikkje registrerte der.
Det finst ikkje eksakte tal, men Hovudredningssentralen anslår at berre 10 prosent av sivile båtar er oppført i registeret.
Samstundes ser dei kor viktig registeret er når dei kan ringe båten som ligg nærast.
– Kanskje kan dei vere først på staden. Eller kanskje kan dei vente på staden til ein større ressurs kjem fram, og dermed sikre ein trygg redningsaksjon.
Fryktar skipshavari
Større hendingar har gjort redningsleiarane meir bevisste på kva dei faktisk har av ressursar.
I mars 2019 hamna cruiseskipet «Viking Sky» i havsnaud med 915 passasjerar.
Den gongen klarte redningspersonell å evakuere 479 med helikopter før skipet gjekk inn til Molde med dei andre passasjerane.
Men i ein liknande situasjon på ein annan stad, med eit anna ver, kan det bli stort behov for båtar.
Frykta er å vite at det finst båtar i nærleiken, utan å kunne kome i kontakt med eigar.
– Vi må vere førebudde på dei store hendingane. Får vi til dømes ei ny stor cruise-hending i ytre Sognefjorden, så ligg det godt med båtar i nærleiken. Då er det viktig for oss å kome raskt i kontakt med dei, seier Bull.
Reint praktisk fungerer registeret slik at det er eigar av båten som skriv inn naudsynte opplysningar. Dermed er opplysningane tilgjengelege for Hovudredningssentralen, men også for naudetatane elles i landet.
Treng politi, brann eller Kystverket ein båt, så kan dei finne det i ressursregisteret.