Kultur i Vestland

Ein av tre nynorskstudentar har fått negative tilbakemeldingar

Berre 56 prosent av nynorskbrukarar føler det er akseptert å skriva nynorsk i lokalsamfunnet sitt. Det syner ei fersk undersøking Norstat har gjort på oppdrag for Nynorskhuset i Førde og fleire nynorske organisasjonar.

Blant studentar har heile éin av tre fått negative tilbakemeldingar fordi dei skriv nynorsk. – Det er alvorleg at så pass mange opplever å få negative tilbakemeldingar på det norske skriftspråket sitt, seier Svein Olav B. Langåker, som er dagleg leiar i Landssamanslutninga av nynorskkommunar.(NPK)

Tysnesfest får likevel 800.000 i krisehjelp frå kommunen

Eit samrøystes kommunestyre gjekk tysdag kveld inn for å gi 800.000 kroner til Tysnesfest, som dei siste to åra har eit samla underskot på 10 millionar kroner. Føresetnaden er at musikkfestivalen også får krisepakkar frå andre, skriv Tysnes.

Rådmannen tilrådde å avslå søknaden, men politikarane slettar 300.000 kr som Tysnesfest skulda kommunen, og gir 500.000 kr som rentefritt lån. Lånet kan bli omgjort til tilskot dersom økonomien til Tysnesfest om tre år «ikkje gjer det forsvarleg med tilbakebetaling».

Kronprinsen kjem til Vestland i dag

Kronprins Haakon kjem til sognekommunane Aurland og Lærdal tysdag. Fylkesturen varer i tre dagar og endar i Solund. Fylkesbesøket startar tysdag 26. september i Aurland og Lærdal, heilt inst i Sognefjorden, skriv Kongehuset. Onsdag går ferda vidare til Sogndal og Høyanger kommunar. Torsdag 28. september er siste dag, og turen endar i Solund kommune. Kronprinsen reiser i kongeskipet Norge. Kronprinsesse Mette-Marit er sjukmeld for tida og kan ikkje vera med som planlagt.(NPK)

Frårår redningspakke til Tysnesfest

Rådmannen i Tysnes tilrår at kommunestyret tysdag avslår søknaden frå Tysnesfest om 800.000 kroner i støtte. Etter eit samla underskot på rundt 10 millionar kroner dei to siste åra, treng festivalen 4 millionar kroner i frisk kapital frå kommunen, kraftlaget og næringslivet.

Rådmannen meiner dette likevel ikkje vil sikra festivalens framtid, sjølv om ein klarer å unngå konkurs. Ordføraren og mange andre i kommunestyret er involverte i Tysnesfest, og dermed inhabile.

Startar arkeologiske utgravingar i Kaupanger

Denne veka er arkeologar i gang med utgravingar i Kaupanger i Sogn. I mellomalderen, altså grovt rekna frå rundt 1000 til tidleg 1500-talet, var Kaupanger ein viktig handelsplass. Det er tidlegare gjort utgravingar i det forskarane reknar med var kjernen av handelsplassen, der det kanskje budde opp mot 200 menneske.
Men kor stor denne handelsplassen faktisk var – er usikkert. – Det er det fagfolk håpar å finne ut no, seier arkeolog Siv Skjelbreid Rise i Vestland fylkeskommune.