Hove har signert ein kontrakt med blåtrøyene som strekkjer seg over dei neste 3,5 åra.
17-åringen vart den første spelaren født på 2000-talet som debuterte i eliteserien då han vart bytta inn borte mot Aalesund i 2016.
- Les også: Hove vart tidenes yngste proff i Sogndal
– Det er med ilt i magen at vi slepper Johan frå oss i dag, då vi ville ha han her hjå oss. Dette er noko Johan sjølv vil, og vi ønsker han lukke til vidare, seier Sogndal-trenar Eirik Bakke til klubben si nettside.
– Ei tøff avgjerd
Hove har 29 offisielle kampar for Sogndal og har 38 aldersfastlagde landskampar.
No ser han fram til å trekkje drammensklubben si blå trøye over hovudet.
– Det har vore ei tøff avgjerd å reisa frå Sogndal, men eg trur det er eit val som er godt for meg. Sogndal ville veldig gjerne ha meg med vidare, men eg følte også at Strømsgodset hadde veldig lyst til å få meg over. Det var ei totalvurdering som vart avgjerande, seier Hove til Sogndal si nettside.
Vil passa inn
Sogndølen var i førre veke på treningsopphald med Strømsgodset. Både sportssjef Jostein Flo og trenar Bjørn Petter Ingebretsen likte det dei såg.
– Johan har gått gradane i Sogndal heile vegen. Eg synest det er på sin plass å skryta av Sogndal og deira måte å driva spelarutvikling. Det har også vore ein veldig god prosess med leiinga for å få til denne overgangen. No skal vi hjelpe Johan til å ta det neste steget og vi er trygge på at han vil passa veldig godt inn her hos oss, seier Flo til godset.no.
– Uoversiktleg for alle
Dei to klubbane er ikkje ukjende for kvarandre. For fire år sidan gjorde midtstoppar Gustav Valsvik same valet. Fleire var kritiske då nyhenda kom om at Hove trena med Godset.
– Det har vore uoversiktleg for alle partar, men no har vi fått ei avklaring på ei sak som veldig mange meiner mykje om, seier sportsleg leiar Håvard Flo til NRK.
– Er dette eit teikn på at Sogndal er på veg vekk frå den lokale profilen?
– Nei, det trur eg ikkje. Vi har veldig fokus på ein sterk profil, og Johan var del av det og ein del av framtida. Han var ein spelar vi skulle utvikle og forme.
Ynskte speletid
Flo seier Hove ynskte meir speletid. Noko Sogndal ikkje kunne garantere.
– Men, det er sterk konkurranse i laget og spesielt i posisjonen Johan spelar. Så er det Eirik som på sportsleg grunnlag tek ut laget han meiner er best for å konkurrere, seier han og ynskjer Hove lukke til på Marienlyst.