I industribygda Årdal inst i Sogn har Arbeidarpartiet hatt makta i 60 samanhengande år, og ved fleire høve fått meir enn 70 prosent av stemmene.
I år er det berre eitt anna parti (Høgre) som stiller med konkurrerande liste i kommunen, og utfallet er alt gitt:
Det vert raudt fleirtal, og ordførarklubba vil framleis tilhøyre ein sosialdemokrat.
I ei meiningsmåling frå juni låg Ap an til å få 73,5 prosent av stemmene.
Men ikkje alt er idyll for Arbeidarpartiet i Ap-bastionen.
I staden verserer skuldingar om «solutspel», «åleinegang» og «lekkasjar».
– Han måtte stå skulerett
For ikkje lenge sidan vart ordførar Hilmar Høl (Ap) irettesett av heile det sosialdemokratiske makttriangelet:
- styret i Årdal Arbeidarparti
- kommunestyregruppa
- medlemsmøtet i Årdal Arbeidarparti
– Det har vore så kritikkverdig at han måtte stå skulerett, forklarte varaordførarkandidat Anne Kauppi (Ap) i NRKs valkamputspørjing sist veke.
Bakgrunnen for sanksjoneringa er «soloutspelet» der ordføraren kringkasta eit nytt syn på den betente vindkraftsaka i kommunen – utan å forankre det i partiet.
Ordføraren har tidlegare profilert seg som motstandar av vindkraft, men etter å ha forsikra seg om at utbyggjaren ville vere lokal kom han tidlegare i år ut av tenkjeboksen og kunngjorde til omverda at han har endra syn frå nei til ja.
Oppdatering: I ein tidlegare utgåve av denne saka stod det at vindkraft-utbyggaren Fred Olsen Renewables er utanlandsk. Det er feil.
– Hadde aldri trudd at innhaldet i eit lukka møte skulle verte referert i NRK
Snuoperasjonen kom bardus på resten av partiet, som har halde fast ved at dei vil ha meir informasjon før dei bestemmer seg.
Og det er kjernen i konflikten: Med kva rett kan ordføraren lufte sine eigne ønske og preferansar – utan å gå vegen om partikameratar?
Har han gått for langt i å forskotere og påverke nødvendige partiprosessar?
Og korleis kjenst det å bli kalla inn på teppet av sine eigne?
– Eg har teke kjeften både frå den gamle gruppa, og dei som blir den nye gruppa. Men eg hadde aldri trudd at innhaldet i eit lukka møte skulle verte referert i NRK, seier Høl til NRK.
Han er ikkje tilfreds med at partikameraten har røpt scener frå kammerset for open scene.
– Det meiner eg er like grovt som det eg har gjort, seier han.
Lei seg for den «skarpe ordlyden»
Partileiar Christian Sønstelien har tatt kontakt med både ordførar- og varaordførarkandidaten for å mane til forsoning.
– Eg har snakka med begge, og Anne har beklaga måten ho ordla seg på, seier han.
Varaordførarkandidat Anne Kauppi seier til NRK at ho er lei seg for den «skarpe ordlyden».
– Eg burde ha ordlagt meg annleis.
Ho legg til at dei har hatt «ein intern prosess» og at ho reknar seg som «ferdig med saka».
– For meg er det heilt uproblematisk å drive valkamp saman med Hilmar, seier ho.
Då NRK tek kontakt med Høl er han framleis litt vonbroten, men villig til å sjå framover:
– Eg kjenner eg har den tilliten eg treng for å drive valkamp som ordførarkandidat.
– Men det er klart eg tykkjer ikkje det er kjekt å bli blåse ut i media i ei sak som eg meiner tilhøyrer gruppa til Arbeidarpartiet.