– Vi må kunne seie at vi har lagt frå oss dei seine tidene, seier salsdirektør, Lars Conradi Andersen i Havyard ship technology i Leirvik.
I det siste har dei vunne fleire anbodsrundar og har kontraktar på ti ferjeleveringar innan 2018/19.
– No blir det bra med aktivitet ved verftet, det er det ingen tvil om, seier Andersen.
- Les også: Større aktivitet i 2018 i Leirvik
– Blir behov for fleire tilsette
Den nye kontrakten dei har landa med Fjord1 er ei levering på fem el-drive ferjer som skal til Sunnmøre. Ferjene blir 100 meter lange og skal kunne frakte 120 bilar på strekkane Hareid-Sulesund og Magerholm-Sykkylven. Skroget på båtane blir bygd i Tyrkia, og sjølve utrustinga skjer i Leirvik i Sogn og Fjordane.
Etter å ha levert ein brønnbåt for nokre veker sidan, seier Andersen at det er litt rolegare tider akkurat no. Men reknar stor aktivitet og mange arbeidsplassar i tida framover.
– No er vi oppunder 200 faste tilsette. Men det vil ta seg opp og bli behov for mykje folk i tida framover, seier han.
Omstilling
Det har vore nokre tøffe år og tronge økonomiske tider for bedrifta. I 2012 var alt av leveringane deira til offshore. No er det heilt vekke.
– Omstillinga har vore tøff. Men no har vi andre bein å stå på innanfor fiskeri, oppdrett og ikkje minst transport og ferjer, seier Andersen.
Sei satsar mykje på ferjer framover og er særs konkurransedyktige innan ferjeleveringar ifølge Andersen.
– Kontraktane vinn vi i tøff konkurranse og det er ingen automatikk i det, seier han.
- Les også: No eig Sævik 67 prosent av Fjord1