Norsk skips­verft blir seld til Tyrkia: – Dette skaper framtids­tru

I Leirvik i Hyllestad har dei bygga skip i over 85 år.

Lokalsamfunnet kransar rundt hjørnesteinsbedrifta Havyard der arbeidsoppgåver har gått i arv gjennom generasjonar.

No går verftet ei ny tid i møte, etter at det norske Herøy-baserte selskapet Eqva sel verftet til tyrkiske Tersan Shipyard.

Frå før har det tyrkiske selskapet om lag 4200 tilsette på to verft i Tyrkia, eit utanfor Istanbul og eit i Yalova.

– Vi er trygg på at Tersan vil vere ein sterk ny eigar for Havyard Leirvik, med tydeleg strategisk interesse for å halde fram sin stolte industrielle tradisjon, fortel styreleiar i Eqva, Even Matre Ellingsen.

Han peiker på at det nye eigarselskapet er ein leiande aktør med solid ekspertise og stort kundenettverk.

– For Eqva er det viktig at vi overlét verftet i gode hender, seier Matre Ellingsen.

Kan gå fleire retningar

Kva som blir utfallet av oppkjøpet, er for tidleg å seie, fortel Hugo Strand, styreleiar i bransjeforeininga Norske Skipsverft.

Han peiker på fleire moglege utfall.

Anten kan Tersan satse langsiktig, og investere i norsk skipsbygging med nybygg i Hyllestad.

Eller så kan verftet bli eit serviceverft for skip som vert bygd i Tyrkia.

– Mange frykter at Havyard blir omgjort til eit serviceverft som skal drive med vedlikehald og garantiarbeid, fortel han.

– Men er det negativt for Havyard eller generelt for norske verft?

– Dersom det skjer, vil det utvilsamt vere negativt for norsk skipsbygging og verdiskaping.

Tersan opplyser at oppkjøpet vil styrke deira posisjon i Nord-Europa og auke produksjonskapasiteten.

– Me har trua på at kjøpet vil vere eit kraftig steg framover for selskapet, seier Ahmet T. Paksu, som sit i styret til Tersan Shipyard.

– Ser fram til å bli ein del av Tersan

Administrerande direktør i Havyard Leirvik, Tor Leif Mongstad ser lyst på oppkjøpet.

Han meiner dei må inn med større prosjekt for å ha nok omsetning til å drive verftet.

– Det er eit svært anerkjend selskap med godt omdøme i internasjonal skipsfart, og som har ein klar ambisjon om å styrke sin posisjon ytterlegare.

– Ambisjonane er heilt tydelege om at me no skal begynne med nybygg, fortel Mongstad.

Han deler optimismen med ordførar Kjell Eide (Ap) i vestlandskommunen.

– Eg trur dette blir bra. Dette er ein kjend aktør som er finansielt sterk, og dei har tankar om å utvikle verftet, meiner Eide.

Han håper dette vil bety at det snart kjem nye skipsbygg i dokken i Hyllestad.