Blar opp millionar for å berge over 100 år gamle trapper

Frå dalbotnen i industristaden Høyanger og opp i fjellsida går nokon av dei brattaste trappene i Noreg.

Bygd i 1916 i samband med kraftutbygginga, og brukt år etter år i det som vart omtalt som landets brattaste motbakkeløp.

Men til liks med den kjende Fykantrappa i Glomfjord, har Statkraft i fleire år hevda at tryggleiken er for dårleg.

I 2021 uttalte selskapet at det ikkje lenger er villig til å ta ansvar for eller bruke pengar på dei.

– Vi har ikkje lenger bruk for desse trappene og planen er å rive dei, sa kraftverkssjef for Statkraft i Sogn, Inge Hass, til NRK.

Det vart starten på ei kraftig lokal og nasjonal mobilisering, der også Ap-leiar Jonas Gahr Støre bad Statkraft ta ansvar.

Ved fleire høve sa den statleg eigde straumgiganten at trappene ikkje var deira ansvar.

Men no kan det likevel gå mot ei løysing.

Ønsker å bevare

Dei siste åra har lokale krefter jobba for å redde trappene.

Høyanger Næringsutvikling vil gjere kraftanlegget til ein «spektakulær attraksjon som gir verdiskaping kring næringsutvikling og stadutvikling.»

Dei konkrete planane no er å lage eit nytt trappeanlegg, sjølvsagt i aluminium ettersom bygda er kjent for å huse aluminiumsprodusenten Hydro.

Førre månad søkte dei Statkraft om å overta trappene, røyrgata og trallebana.

Og no kan redninga ha kome.

Statkraft har lagt 20 millionar kroner på bordet for å overføre anlegget til stiftinga og kommunen.

Det var Ytre Sogn som melde dette først.

Det nye anlegget er rekna å koste 28 millionar kroner.

Planen er at resten av summen blir finansiert av bankmidlar og fylkeskommunen.

Difor snudde Statkraft

Formelt ligg det inne ein søknad frå Statkraft til NVE om riving av trappene.

Håpet til Statkraft og det lokale initiativet er at dei nye planane skal spelast inn i høyringsrunden, der det blir søkt om planendring.

Statkraft går langt i å antyde at det ville blitt betydelege kostnader for selskapet, også med riving.

– Vi ser på dette som ein vinn-vinn-situasjon, seier Inge Hass i dag.

Så er spørsmålet om NVE kjem til å godta dei nye planane.

– Vi har ikkje fått saksbehandla saka. Det er viktig at det er kontroll på areala, blant anna av miljøomsyn. Vidare eigarskap må følge opp bruken på ein god måte, seier seksjonssjef Carsten Jensen

Engasjerte eldsjeler

Etter at Statkraft i 2021 annonserte at dei skulle stenge trappene og hadde mål om å rive dei, let ikkje dei lokale reaksjonane vente på seg.

Dei 107 år gamle trappene vart løfta fram som viktige for folkehelsa og friluftstilbodet i kommunen, og ikkje minst eit levande bilete på industrihistorie og kulturminne.

Malin Frøyen Bergset var blant dei som brukte trappene til trening, og gjekk i dei titt og ofte. Ho ønskte så sterkt å redde trappene at ho var villig til å lenke seg fast i dei.

I dag seier ho dette:

– Eg saknar trappene kvar einaste dag. Viss dei får dei i gang igjen blir eg altså så glad!