Fredag morgon klokka 06.00 trer dei nye korontiltaka i kraft i Bergen.
– Kven som helst kan bli smitta kvar som helst. Dette er ikkje ein situasjon vi vil vera i, difor innfører me nye tiltak i dag, starta fungerande byrådsleiar Lubna Jaffery.
Etter ein lang periode med skyhøge smittetal ser Bergen kommune seg no nøydd til å innføre nye koronatiltak:
- maksgrense på ti personar samla i private heimar
- påbod om munnbind om ein ikkje kan halde ein meter avstand
- anbefalingar om heimekontor
Sjå alle tiltaka her:
Talet på smitta har passert 100 fleire dagar i det siste, og tala er dei høgaste sidan november 2020.
Dei nye tiltaka blir ein del av dei forskrifta som blei presentert 5. august.
Framleis mange uvaksinerte
– Me er ikkje i mål enda, fortalde Jaffery under pressekonferansen i dag.
Ho talte direkte til dei som kanskje er skeptiske til nye tiltak.
– Det er framleis mange som ikkje er fullvaksinerte, heldt den fungerande byrådsleiaren fram. Ei vaksinedose har vist seg å ofte ikkje vera nok når det er snakk om deltavarianten av koronaviruset.
Bergen kommune har snart fullvaksinert 40 % prosent av dei over 18 år. Men seinast førre veke oppmoda helsebyråd Beate Husa om at fleire skulle registrere seg for første vaksinedose.
– Blir smitten for stor, klarer ikkje smittesporarane å gjere jobben sin. Då mister dei kontrollen. Blir helsepersonell smitta kan det gå ut over vaksineringa, eller kome til sjukeheimar, slik me allereie har sett, forklarte Jaffery.
Fleire sjukeheimar i bergensområdet har fått koronasmitte dei siste vekene, og ein uvaksinert bebuar døyde 7. august i år.
– Kan bli naudsynt med nye grep
Den fungerande byrådsleiaren forklarte at det kan vera naudsynt med nye grep, om smittesituasjonen blir verre enn den allereie er.
– Me følgjer nøye med.
I tillegg til dei tiltaka presentert 5. august, innfører Bergen kommune no ei maksgrense på ti personar samla i private heimar. Fullvaksinerte blir ikkje talt som ein av dei ti. Kommunen anbefaler at ein ikkje har meir enn fem gjestar.
Det blir også påbod om å bruke munnbind om det er fare for at ein ikkje kan halde 1 meter avstand. Det blir eit generelt påbod om å bruke munnbind i taxi.
Bystyret anbefaler også tilsette som må bruke kollektivtransport om å ha heimekontor.
Dei nye tiltaka går inn i dei tiltaka som allereie er i bruk, og vil vera gjeldande frå og med torsdag 12. august kl. 06.00 til og med 22. august.
Høgt smittetrykk
For ei dryg veke sidan nådde smittetala i Bergen sitt høgaste punkt på ni månader.
5. august kom byrådet ut med nye smitteverntiltak, der dei blant anna anbefalte maksimalt ti personar i private heimar og nye reglar i utelivet.
No blir anbefalinga altså til eit påbod.
Men smittetrykket ser ikkje ut til å gi seg med det første.
Onsdag var det registrert 92 nye personar med korona i Bergen. Dei aller fleste som er smitta er i aldersgruppa 13-19 år. Det var 2498 testa som seg måndag.
Samstundes er det sju personar som er innlagde på sjukehus med covid-19, ingen får intensivbehandling.
– Når det er så mykje smitte kan det vera lurt å tenke seg om ein gong til før ein gjer noko som utset seg og andre for unødvendig smitterisiko, seier smittevernoverlege Egil Bovim.