Odin frå Rådebank kastar loss i musikal om livet på havet

– Det blir eit litt anna fartøy denne gongen.

Skodespelaren Odin Waage, også kjent som Glenn-Tore frå Rådebank, byter Volvoen med ei skute.

– Det er jo litt sånn det er med skodespel, at ein kan dykke inn i mange ulike roller.

I sommar er han nemleg aktuell i musikalen «Havet».

Sorg, glede og ung kjærleik

Handlinga i musikalen er sett til Sandefjord i 1959 og handlar om sjøfart, sjøfolk og familiane deira.

Produsenten og dama bak ideen er Dorina Eldøy-Iversen.

Det var hennar eigen familiebakgrunn som førte til framsyninga.

– Eg hadde ein ide om å skrive om opphavet mitt, eg er barnebarn av ein gammal kvalfangar og er fascinert av historia om sjøfart.

Sorg, glede og ung kjærleik er nokre av temaa som blir utforska i stykket, fortel Eldøy-Iversen.

– Publikum vil få eit ekstrakt av sjøfartshistoria, og dens konsekvensar for dei som blei sende ut altfor tidleg, fortel, ho og legg til:

– Vi skal også ta tak i kvinnehistoria, det var jo dei som var igjen og heldt hjula i gang.

• Les også: Merkar Rådebank-effekt: – Fleire lurer på kva yrket handlar om

Klar for nye utfordringar

Waage speler rolla som «Olav», ein storebror som har vore på havet sidan han var fjorten.

– Olav er ein fyr som har blitt send ut på sjøen tidleg og som har sett og opplevd ein del ting, fortel Waage.

Sjølv om kontrastane mellom Rådebank og Havet er store, er ikkje Waage bekymra for utfordringa med ei ny rolle i heilt nye omgivnader.

– Eg må sette meg inn i rolla og den karakteren eg skal spele, og kva det inneber, men eg trur det blir veldig bra.

Og songstemma feilar det heller ingenting ifølge Waage.

– Eg har sunge og skrive låtar dei siste ti åra, så det blir spennande å sette det saman med skodespel.

Premieren er 29. juni på Harmoni arena i Sandefjord.