Det nærmar seg eit nytt år.
På sjølve nyttårsaftan er det tradisjon for mange å fyre opp fyrverkeri.
Men dette skaper ein del utfordringar og redsel for dyr og eigarar.
Bønder håpar folk vil ta omsyn og har eit ønske:
Følg reglane og skyt berre opp fyrverkeri innanfor tidsrommet klokka 18.00 til 02.00 på nyttårsaftan.
– Då kan alle som har dyr vere førebudde, og då blir det lettare for alle å handtere nyttårsaftan, seier bonde Inger Synøve Johnsen.
Kan få store konsekvensar
Johnsen er heiltidsbonde saman med mannen og har griser, høner og rundt tusen storfe på garden i Våle.
På nyttårsaftan passar dei på å ha dører igjen og gir ekstra fôr. I tillegg følgjer dei ekstra med i fjøset, då dyra kan bli skremde og urolege.
– I verste fall kan dei bryte seg ut og stikke av. Lause dyr midt på natta på nyttårsaftan, det er det ingen som har lyst på.
Bodhild Fjelltveit er sauebonde i Bergen og 2. nestleiar i Norges Bondelag. I tillegg jobbar ho mykje med dyrevelferd.
Alle dyr reagerer ulikt, men nokre kan bli ville, fortel ho.
– Vi har mange dyr i fjøset som kan bli skremde, og det kan fort få store konsekvensar. Så då er det å tenkje seg om, om det er nødvendig å fyre opp rakettane.
Det aller viktigaste
I 38 år har Mimmi Hauglind vore dyrlege. Ho er klar i talen når det gjeld kva dyreeigarar skal gjere på nyttårsaftan.
– Tilsyn. Det er det aller viktigaste.
– Kva kan skje med dyra når dei blir redde?
– Når dyr blir redde, kan dei finne på å stikke av viss det er praktisk mogleg. Dei kan også springe vilt omkring i ein binge og skade seg.
Men i løpet av åra som dyrlege, har ikkje Hauglind opplevd dette. Ho er likevel ikkje spesielt glad i rakettar.
– Det er såpass mange dyr som reagerer, og særleg mange mindre husdyr som blir redde.
Oppmoding
Fjelltveit håpar folk tek omsyn på den siste dagen i året. Og heller har ein felles og offentleg plass for oppskyting av fyrverkeri.
– Som dyreeigar har eg meir sansen for det. Først og fremst med tanke på dyra som blir stressa og redde.
I tillegg håpar ho at bønder tenkjer på eigen tryggleik først, viss dyra reagerer.
– Ein okse eller ei ku er fort mellom eit halvt og eit heilt tonn, så å tenkje at ein skal inn for å roe ned, det er nok ikkje det luraste.