Harde kampar i Ukrainas nest største by – guvernøren meiner Ukraina har tatt tilbake kontrollen

• Bad folk halda seg i tilfluktsrom
• Har søkt dekning i kjellaren
• Gassrøyrleidning sprengt
• Hevdar å ha omringa hamnebyar
• Ukraina: - Skal møtest til samtaler

Guvernøren hevdar at Ukraina no kontrollerer byen Kharkiv igjen. Det melder nyheitsbyrået Reuters rundt klokka 12:00 norsk tid.

– Kharkiv er fullstendig under vår kontroll, sa Oleg Sinegubov og la til at hæren viste ut russiske styrkar under ein «opprydningsoperasjon».

Laurdag morgon kom det meldingar om gatekampar i byen.

Russiske soldatar hadde tatt seg inn i byen som er Ukrainas nest største. Det opplyste ein rådgivar i det ukrainske innanriksdepartementet ifølgje Reuters.

Ifølgje rådgivaren Anton Herashchenko rulla dei russiske soldatane inn i byens gater.

Ein video som var lagt ut av Ukrainas statlege kommunikasjonsteneste viste fleire militær køyretøy inne i Kharkiv.

Dei la også ut bilete av ei brennande stridsvogn.

Bad folk halda seg i tilfluktsromma

Ifølge Oleg Sinegubov, som er guvernøren i Kharkiv, hadde russiske styrkar klart å bryta gjennom delar av forsvarslinjene i byen.

– Den russiske fiendens lette køyretøy har trengt seg inn i Kharkiv, blant anna i sentrum, sa han.

Samstundes la han til at dei ukrainske regjeringsstyrkane «øydelegg fienden».

Han bad innbyggjarane halda seg i tilfluktsromma, skreiv avisa Kyiv Independent.

Kharkiv har nesten 1,5 millionar innbyggjarar og ligg nordaust i Ukraina, rundt fire mil frå grensa til Russland.

NRKs korrespondent Jan Espen Kruse seier at byen kanskje er det nest viktigaste målet for dei russiske styrkane, etter hovudstaden Kyiv. Han seier vidare at det verkar som det går føre seg ein avgjerande kamp i Kharkiv.

Har søkt dekning i kjellaren

Kjærasteparet Andrii (29) og Mariia (30) har sidan laurdag vore i eit rom i kjellaren sin i søraust i Kharkiv med hunden og katten sin. Dette rommet er utan vindauge, og dei er der mesteparten av dagane og om natta.

Dei vil bli omtalte berre med førenamn og vil ikkje visa bilete av ansikt då dei er redde for kva som eventuelt kan skje.

I går var dei ute av huset i berre to minutt, før bombinga starta på nytt.

– Det var ei veldig hard natt i Kharkiv. Vi hadde bombing over nesten heile byen, bustadblokker, bustadområde, både i nord, sør, og søraust, seier Andrii.

– I nord i Kharkiv har eg ein ven der bygninga ved sidan av dei blei treft av ein rakett. Minst ei kvinne er død, og dei andre trur eg er i live, hevdar han.

Han har sjølv sett røyk i horisonten frå der han bur. Røyken trur han kjem frå ein oljetank eller bensinstasjon som blei bomba eit par kilometer frå huset der han bur. Han seier russiske troppar med opp til hundre personar angrip frå forskjellige punkt og innover i byen.

– Nokre av dei er alt eliminerte, medan kanskje halvparten av dei framleis er i byen og prøver å gøyma seg bustadbygningar for å laga ein gatekrig.

Andrii og Mariia vurderte å evakuera frå byen, men seier det er veldig farleg å gå ut på gata. Der dei sit høyrer dei bombinga, glasa i vindauga dirrar og dei høyrer skot. Andrii har ei klar oppfordring:

– Den ukrainske hæren kjempar hardt, men vi er definitivt i undertal. Vi treng så mykje hjelp som vi kan få frå Europa, frå Nato, frå USA. Same frå kven, me treng berre hjelp til å stoppe krigen.

Gassrøyrleidning sprengt

Også i natt rundt midnatt melde Kyiv Independent at Kharkiv var under angrep.

Seinare på natta melde den ukrainske hæren at det russiske angrepet ved Kharkiv var slått tilbake.

Men like etter skal ein gassrøyrleidning ha blitt ramma av eit angrep og begynt å brenna.

Ifølgje kontoret til Ukrainas president Volodymyr Zelenskyj sprengde styrkane gassrøyrleidningen i byen.

Innbyggjarar i området blei bedne om å lukka vindauga og drikka væske.

Regjeringa frykta eksplosjonen ville føra til miljøkatastrofe.

Hevdar å ha omringa to ukrainske byar

Regjeringa i Moskva hevdar at styrkane deira har omringa byane Kherson ved Svartehavet og Berdjansk ved Azovhavet i den sørlege delen av Ukraina. Begge byane er viktige hamnebyar,

– I løpet av dei siste 24 timane har byane Kherson og Berdjansk blitt fullstendig blokkerte av dei russiske væpna styrkane, sa talsmannen Igor Konasjenkov for Russlands forsvarsdepartement, ifølgje russiske nyheitsbyrå.

Ifølge Konasjenkov har russiske styrkar også tatt kontroll over ein flybase nær Kherson.

Ukrainas president Volodymyr Zelenskyj hevdar okkupasjonsstyrkane angrip alt, også ambulansar.

Han sa også at dei går til angrep på sivile området der det ikkje er militær infrastruktur, melder Reuters.

– Laurdag kveld var brutal, sa presidenten.

Ukraina: - Skal møtest til samtaler

Ukraina seier søndag ettermiddag at dei skal møte Russland til samtaler på grensa mellom Ukraina og Kviterussland. Det har ikkje vorte bekrefta av Russland.

Myndigheitene i Russland har tidlegare hevda å vera klare for samtalar med Ukraina i den kviterussiske byen Gomel.

Det melde russiske nyheitsbyrå ifølgje Reuters og AFP.

Russisk statleg fjernsyn melde at ein forhandlingsdelegasjon hadde kome til Gomel og at dei venta på Ukraina.

Gomel er den nest største byen i Kviterussland. I den russiske delegasjonen skal det vera representantar for både forsvars- og utanriksdepartementet, samt presidentadministrasjonen.

Ein rådgivar av ukrainars president Volodymyr Zelenskyj hevda at den russiske delegasjonen hadde kome til Gomel med visse om at det var meiningslaust. Det skreiv Reuters.

Ukrainas president Volodymyr Zelenskyj sa at han var open om samtalar andre stader som ikkje viser motstand mot Ukraina.

Han sa at det hadde vore mogleg med samtalar i Minsk om ikkje Russland hadde angripe Ukraina via kviterussisk territorium.