Putin vil hjelpe Kim med å løyse atomproblemet

Toppmøtet vert halde på eit universitet på Russkijøya, nær hamnebyen Vladivostok, heilt aust i Russland.

Der ønskte Putin den nordkoreanske leiaren Kim Jong-un velkomen, og starta møtet med å seie at Russland ønskjer å støtte positive tiltak på Koreahalvøya.

– Eg er trygg på at ditt besøk til Russland vil hjelpe oss å forstå betre korleis vi kan løyse situasjonen, sa Putin.

Kim svarte med å seie at han ønskjer å styrke banda til Russland.

• Urix forklarar Derfor møtes Kim og Putin

Vil sitje ved forhandlingsbordet

Etter å ha helst på kvarandre gjekk Putin og Kim for å ha eit møte bak lukka dører. Begge var samde om at dei der hadde hatt fruktbare diskusjonar.

– Vi hadde ei grundig samtale på tomannshand, sa Putin ifølgje det russiske nyheitsbyrået Tass.

På førehand hadde rådgjevaren til Putin varsla at atomvåpenprogrammet til Nord-Korea kom til å bli eit av temaa under møtet.

Det var også venta at Nord-Korea ville søkje støtte frå Russland når det gjeld sanksjonar frå vesten, og at landet vil prøve å få til ei økonomisk avtale med Russland, ifølgje The Guardian.

For russarane er møtet ein sjanse til å vise seg fram som ein viktig aktør innan internasjonale forhandlingar med Nord-Korea.

Etter møtet fortalde Putin at han hadde bede Kim om å orientere USA om at Russland heretter vil vere med på atomforhandlingane.

Han tok også til orde for å start opp att sekspartsforhandlingane, som var eit diplomatisk forsøk på å løyse striden rundt atomvåpenprogrammet etter at Nord-Korea trekte seg frå ikkjespreiingsavtala i 2003.

Forhandlingane var mellom Nord-Korea, Sør-Korea, USA, Russland, Kina og Japan. Dei braut saman i april 2009, etter at FN varsla skjerpa sanksjonar mot Nord-Korea.

Kjølig forhold til USA

Nord-Koreas atomprogram var også tema då USAs president Donald Trump og Kim møtte kvarandre i Hanoi tidlegare i år, men dette møtet enda utan noka nedrustingsavtale.

Leiinga i Pyongyang har også gjort det klart at dei ikkje lenger ønskjer at USAs utanriksminister Mike Pompeo skal sitje ved forhandlingsbordet.

• Urix forklarar Kollaps for Trump og Kim, men ikkje krise

Etter at atomsamtalene mellom USA og Nord-Korea stoppa opp har Kim snudd seg til Russland, som har tatt til orde for å lette på sanksjonane mot landet.

Sjølv om Russland ikkje ønskjer at Nord-Korea skal ha atomvåpen, sa Putin at han forstår at landet krev garantiar for eigen tryggleik og suverenitet før dei går med på å gje frå seg atomvåpenprogrammet sitt.

Sist ein russisk president og ein nordkoreansk leiar møtte kvarandre, var då Dmitrij Medvedev møtte Kim Jong-il for åtte år sidan. Då sa Kim Jong-il at han var villig til å slutte med atomtestar.