Forholdet mellom USA og Nord-Korea er blitt så spent at det er nødvendig å «kjøle ned» situasjonen ved hjelp av eit anna land som kan mekle, meiner paven.
Han kommenterte konflikten då han møtte pressa om bord på flyet frå Egypt til Vatikanet. Han sa at situasjonen er blitt så alvorleg at verda risikerer ein svært øydeleggjande atomkrig.
– Noreg kan mekle
– Eg ber alle politiske leiarar om å arbeide for å finne ei løysing på problema gjennom diplomati, sa paven.
– Det er mange land, til dømes Noreg, som har erfaring med å leggje til rette, med å forhandle. Noreg er alltid klar til å hjelpe. Dette er eitt av mange land som vil kunne bidra, sa han.
- Les også:
Noreg forhandla fram Osloavtalen mellom Israel og Palestina på 1990-talet, og har også spelt ei sentral rolle som meklar i mange andre konfliktar.
Vil møte Trump
Paven oppfordra FN til å presse på for å finne ei løysing på konflikten. Han sa også at han er klar til å møte president Donald Trump når han kjem til Europa i slutten av mai.
- Les også:
Laurdag gjennomførte Nord-Korea nok ein rakett-test. Få timar seinare blei det kjent at forsvaret i Sør-Korea var i gang med ei ny militærøving saman med amerikanske marineskip.
Tryggingsrådet i FN diskuterte Nord-Korea-konflikten fredag. Der sa den amerikanske utanriksministeren, Rex Tillerson, at USA vurderer nye sanksjonar dersom landet gjennomfører fleire testar av atomvåpen.