Minst 29 menneske blei drepne då dei venta på naudhjelp i Gaza torsdag, ifølgje styresmaktene i Gaza.
Den første hendinga skal ha skjedd i al-Nuseirat-leiren på midten av Gazastripa. To israelske luftangrep trefte eit senter med forsyningar og naudhjelp.
Seinare torsdag kveld blei 21 personar drepne og meir enn 150 skada då israelske militæret opna eld mot ei kø av menneske som venta på lastebilforsyningar med naudhjelp. Det skal ha skjedd heilt nord på Gazastripa, skriv Reuters.
Palestinarar inspiserer ruinane på det som skal vere ein naudhjelpssentral i al-Nuseirat-leiren.
Foto: Ahmed Zakot / ReutersAvviser hendingane
IDF, det israelske militære avviser å ha skote med folkemengda og seier det er «falske nyheiter».
– Medan IDF ser nærare på hendinga, oppfordrar vi media å gjere det same, og berre stole på truverdig informasjon.
Den fem månadar lange krigen har ført til at store delar av befolkninga på Gazastripa er på flukt. 2,3 millionar menneske er fordrive.
Palestinarar flyktar nordover igjen, etter at den israelske offensiven tek seg opp i sør.
Foto: Ahmed Zakot / ReutersDet er også stor mangel på mat og drikke. Ifølgje FN er det fleire born som dør av svolt.
Tidlegare i februar blei over 100 personar drepne då dei venta på forsyningar.
Verdas matvareprogram har stansa leveringane til Nord-Gaza, då bakkekampane gjer det for vanskeleg. FN meiner ansvaret for å sikre trygg ferdsel er Israel sitt.
Det er mange lastebilar med naudhjelp som ventar på å sleppe inn i Gazastripa.
Fleire land har difor byrja med flydropp av naudhjelp.
Det første skipet er også på veg mot Gazastripa. Dette er ein test for å sjå om det er mogleg å opprette ein sjøkorridor.