Nord-Korea heldt militærparade dagen før OL

– Vi er no i stand til å vise vår status som ei militærmakt i verdsklasse, sa Kim til ei jublande folkemengde på Kim Il-sung-plassen i Pyongyang.

I 40 år har landet halde ein militærparade i april, men denne gongen valde regimet å endre datoen til 8. februar, dagen før OL startar i Pyeongchang.

Militærparaden markerer 70-årsdagen for den koreanske folkehæren. Dei siste dagane skal fleire tusen soldatar ha øvd på paraden nær flyplassen i Pyongyang.

• Les også: USA og Sør-Korea i gang med sin hittil største flyøvelse

Maktdemonstrasjon

I tala gav Kim ordre om å halde beredskapsnivået mot USA og deira tilhengarar på det høgste, slik at «invaderande styrkar ikkje vil vere i stand til å røre republikken, sjølv ikkje med 0,001 millimeter».

Paraden vart ikkje sendt direkte på TV, slik regimet gjorde under den førre store militærparaden i april i fjor. Då nytta Nord-Korea høve til å vise fram nye våpentypar, og viste fram ein video som simulerte eit atombombeangrep mot USA.

Nord-Korea har fått kritikk for at dei vel å halde ein militærparade så tett opp mot OL.

Analytikarar meiner at strategien til Nord-Korea tyder på at landet forsøker å bli rekna som ei atommakt. Samtidig håpar dei å kunne svekkje sanksjonane mot landet, og skape splid mellom Sør-Korea og USA ved å vise fram ei mjukare side under OL.

• Les også: Vinter-OL smelter iskald Korea-konflikt

Vil ikkje møte USA

Same dag som militærparaden, seier Nord-Korea at dei ikkje har nokon planar om å møte USA i Sør-Korea under OL.

Onsdag sa USAs visepresident Mike Pence at amerikanarane snart vil offentleggjere dei hardaste sanksjonane mot Nord-Korea nokosinne.

– USA vil ikkje la Nord-Koreas propaganda kapre OL, sa Pence under eit besøk i Japan.

Før han reiste vidare til Sør-Korea, sa han at han ikkje utelukkar samtaler med representantar for Nord-Korea, men at han sjølv ikkje har bede om det.

Det kjølige forholdet mellom USA og Nord-Korea har også skapt eit dilemma for vertslandet Sør-Korea, som synest det er vanskeleg å planlegge kvar dei ulike VIP-gjestane skal sitte under opningsseremonien.