Gary Stein har tenestegjort i den amerikanske marinen i ni år. I dei to siste åra har han styrt Facebook-gruppa «Armed Forces Tea Party», som er kritisk til Obama-administrasjonen.
På onsdag fekk han beskjed frå militærpolitiet om at han hadde brote forsvaret sine reglar ved å kritisere president Obama og forsvarsminister Leon Panetta.
No kan episoden føre til at Stein kan bli kasta ut av forsvaret.
Kommenterte omstridt lov
Facebook-gruppa «Armed Forces Tea Party» har over 21 000 medlemmar, og har ein klar forankring i høgresida i amerikansk politikk. Ifølgje nyheitsbyrået AP starta Stein gruppa for å oppmuntre andre soldatar til å kjempe for retten til ytringsfridom.
Det som fekk begeret til å renne over for militæret var ein kommentar om at han ikkje ville følgje ordrar frå presidenten, dersom ordren var å fengsle amerikanske borgarar, og å gjere noko som var i konflikt med amerikanarane sine konstituelle rettar.
Kommentaren til Stein kom i etterkant av at Obama signerte ein svært kontroversiell lov i romjula, som gjer at militæret no har høve til å fengsle amerikanske borgarar utan ein rettsprosess.
Kjempar for å bli
Stein er no i ferd med å starte kampen for å bli i militæret, og å bevise at han ikkje har gjort noko som strider mot Pentagon sine reglar.
– Eg har ikkje gjort noko gale. Eg har berre ytra det same som står i embetseiden vår, nemleg at eg vil følgje grunnlova og at eg ikkje kjem til å følgje ordrar som strir mot denne. Dersom dette er ulovleg, kva er Amerika på veg til å bli?
Reglane for det amerikanske forsvaret seier at uniformert personell ikkje kan støtte eller sponse eit politisk parti. Det er også strengt forbode å uttale seg i media om ein politisk kandidat. Offiserar har heller ikkje høve til å tale om forsvarsministeren og presidenten på ein respektlaus måte.
Det sentrale spørsmålet er likevel om denne regelen skal bli vekta tyngre enn Grunnlova. Saka har skapt stor debatt i USA om kvar grensa for ytringsfridomen går.
Støttar innskrenking i ytringsfridomen
Jusprofessor og tidlegare militæroffiser David Glazier meiner at militære heilt klart må gi opp noko av sin ytringsfridom.
– Eg trur det har vore veletablert i lang tid at ytringsfridomen er eit felt der amerikanarar må gi slepp på nokre rettar for å bli med i militæret.
– Orden og disiplin krev at militært personell har respekt for folk med høgare rang. Det gjer at ein bør slå ned på kritiske utsegn mot høgareståande offiserar – heilt opp til presidenten, seier Glazier.
Stein har på likevel fått hundrevis av støtteerklæringar frå andre soldatar som også meiner at Grunnlova bør stå høgare i kurs enn reglar i militæret.
– Berre fordi eg er ein marinesoldat betyr ikkje det at eg ikkje har ytringsfridom eller kan seie mi meining om presidenten som alle andre. Grunnlova trumfar alle dokument, seier Stein.