Morabito blir rekna for å vere leiaren av Ndrangheta-mafiaen, som har sitt opphav sør i Italia. Han blei arrestert i byen Joao Pessoa saman med ein annan italienar måndag.
Pågripinga skjedde det etter felles politiarbeid med Italia, seier brasiliansk føderalt politi.
Italia ønsker å få han utlevert for narkotikasmugling, og han var ein av dei mest ettersøkte personane i Italia då han blei arrestert på eit motell i Uruguay i 2017.
Fram til då hadde han levd med falsk identitet i 13 år i Punte del Este i Uruguay.
«Kokainkongen»
Ifølge brasiliansk politi skal Morabito ha vore involvert i narkotikasmugling mellom Brasil og Europa sidan 1990-talet.
Han har blitt kalla «kokainkongen», og er blant anna skulda for innføring og sal av narkotika i Italia.
Morabito har vore på rømmen frå italienske styresmakter sidan 1995. I 2015 blei han dømd utan å vere til stades til 28 års fengsel av ein italiensk domstol. Straffeutmålinga blei seinare auka til 30 års fengsel.
Rømte frå fengsel
Etter at han blei arrestert i Uruguay i 2017, sat han fengsla medan han venta på å bli utlevert til Italia. Men i juni i 2019 klarte han og tre andre innsette å rømme gjennom eit hol i taket.
Det førte til ei storstilt jakt på fangane, og sjefen for fengselet måtte gå av.
- Les:
Morabito kom seg unna, men etter nesten to år på rømmen, blei han altså gripen på nytt. Denne gongen nordaust i Brasil.
No skal han truleg sitte i eit brasiliansk fengsel til han blir utlevert.