Ein lege ved sjukehuset fortalde tidlegare i dag at direktøren ved sjukehuset var pågripen av israelske styrkar.
– Dr. Mohammad Abu Salmiya blei arrestert saman med fleire andre overlegar, sa ein av avdelingssjefane ved sjukehuset, Khalid Abu Samra, til nyheitsbyrået AFP.
No stadfester altså det israelske forsvaret (IDF) at direktøren er pågripen. Det skriv nyheitsbyrået Reuters.
– Omfattande terroristverksemd
Mannen vil bli avhøyrt om bevis Israel vil leggje fram, om at sjukehuset er blitt brukt som kommando- og kontrollsenter for Hamas, ifølgje IDF.
– På sjukehuset, under leiinga hans, var det omfattande terroristverksemd, i regi av Hamas, skriv IDF i ei fråsegn.
Shifa-direktøren omtalte sjukehuset som eit stort fengsel og ei massegrav då israelske styrkar tok seg inn i det for rundt ei veke sidan.
Torsdag blei rundt 190 menneske evakuerte frå området ved Shifa-sjukehuset. Det er truleg vel 250 pasientar og helsearbeidarar igjen der. Fleire hundre er også samla i området rundt sjukehuset.
Våpenkvile fredag morgon
Etter planen skulle det bli innført våpenkvile på Gazastripa torsdag, og vare i fire dagar. Men no er det klart at våpenkvila ikkje kjem til å starte før fredag klokka 6 norsk tid.
Avtalen er at Hamas skal setje fri 50 kvinner og born som blir haldne som gislar på Gazastripa. Hamas har stadfesta at alle 50 er i live.
Israel skal setje fri 150 palestinske kvinner og born frå israelske fengsel.