Her er norske kanonar i bruk ved fronten i Donbas

Landsbyen er utbomba og nesten forlaten.

Ved det som ein gong var ein park for fest og høgtider i Donetsk fylke aust i Ukraina, står eit stort pansra køyretøy delvis gøymt bak busker og tre.

– Dette er ein normal dag, seier Igor.

Den ukrainske soldaten har i løpet av arbeidsdagen fyrt av 40 granatar frå M109, ein sjølvdriven kanon gitt av Noreg til Ukraina.

Tungt artilleri frå det norske forsvaret er no i full bruk av dei ukrainske styrkane i kampane i Donbas.

– Gammal, men fungerer

Inne i køyretøyet held mannskapet på seks til. Der, blant granatar og anna militært utstyr, ligg også teknisk handbok på norsk, frå den tida kanonen var i bruk i den norske hæren.

På døra inn i maskina står framleis instruksjonar på norsk.

– Det har ikkje vore vanskeleg å lære seg å bruke M109, seier soldaten Serhii.

– Kanonen har ein kraftig motor, og sjølv om han er litt gammal, så fungerer han, seier han.

Utstyr til over 5 milliardar

Dei ukrainske soldatane NRK møter gjentek fleire gongar at dei er svært takknemlege for hjelpa utanfrå.

Noreg har sendt fleire enn 20 artilleriskyts av typen M109 til Ukraina, slik at landet kan forsvaret seg mot russiske åtak.

Totalt har Noreg gitt våpen og forsvarsutstyr til Ukraina til ein verdi av rundt 5,4 milliardar kroner, ifølgje regjeringa.

Kommandanten Pavel sørger for at arbeidet om bord i det norske køyretøyet er koordinert.

– Eg arbeider med ein Ipad, og gir dei koordinatane. Og så er det gutane som stiller våpenet inn mot målet, fortel Pavel.

Takkar Noreg

Nokre av kanonane har vore køyrt så hardt av den ukrainske hæren at dei har vore ute av funksjon i lengre periodar.

Men når NRK er på besøk fungerer alt som det skal. Utstyret speler ei viktig rolle i kampen mot dei russiske styrkane.

– Vi skulle gjerne hatt ein nyare kanon enn dette, men denne fungerer. Vi er svært takknemlege for dette utstyret, seier dei ukrainske soldatane.

I en tidligere versjon av denne saken skrev NRK at noen av kanonene var blitt kjørt så hardt av den norske hæren at de ikke lenger fungerte. Det er feil. Det riktige er at den ukrainske hæren har kjørt dem så hardt.