Dei nye verneområda til havs vil dekke i alt 3.1 millionar kvadratkilometer. Det svarar til over ein tredjedel av dei australske farvatna.
Talet på verneområde er i dag på 27, og planane er å auke til i alt 60.
LES: Koalaen dør ut
Australia har arbeidd med planane i fleire år, men lanserer dei no i samband med det internasjonale toppmøtet om miljø og utvikling i Rio de Janeiro neste veke.
– Det er på tide at verda rundar eit hjørne i vernet av hava våre, og Australia vil vise veg, seier miljøvernminister Tony Burke.
Største verneområdet i heile verda
Det viktigaste området som skal vernast er havområda i Korallhavet rundt Great Barrier Reef, fastslår miljøvernministeren. Dette vil ifølgje han bli det største verneområdet til havs i heile verda.
Great Barrier Reef er verdas største korallrev, og har eit enormt artsmangfald av fisk og virvellause dyr. Området har fleire truga artar.
LES: Great Barrier Reef truga av plantevernmidlar
LES: Vil lokke turistar til å bade med drapsmaskiner
Australia er kjent for det unike artsmangfaldet. Landet husar om lag 7000 unike dyreartar i tillegg til over 21 000 planteartar som ikkje veks naturleg andre stader i verda, og er ein populær turistmagnet.
- LES OGSÅ: Spermkvalar ligg fast på land
Leiting etter olje og gass vil bli forbode i alle vernesoner.
Formålet med dei nye planane er mellom anna å styrke vernet av truga artar som blåkval, suppeskjelpadde, sandtigerhai og sjøku.
Skal sikre artsmangfaldet
– Dette nye nettverket av verneområde vil bidra til å sikre artsmangfaldet til havs, seier Burke.
Miljøvernorganisasjonen Australian Conservation Foundation kallar planane historiske.
- LES OGSÅ: Flaum i Australia kan koste milliardar
I hava rundt Australia er det til no oppdaga om lag 5000 unike fiskeartar som er avhengige av det unike klimaet og miljøet.
– Sjølv om leiting etter olje og gass blir forbode i Korallhavet, er andre havområde framleis sårbare for slike trugslar, seier leiar Don Henry.
Andre miljøvernorganisasjonar skuldar regjeringa for å ha bøygd seg for oljeinteressene og late vere å verne viktige habitat for kval og delfin.
Fiskeriet blir råka
Verneplanane vil også få følgjer for fiskenæringa, noko som har provosert både fiskenæringa og den politiske opposisjonen.
– Dette er svært øydeleggjande, og dei som vil lide mest er kystsamfunna, seier Dean Logan, leiar i fiskeriorganisasjonen Australian Marine Alliance.
Opposisjonsleiar Tony Abbot frå Dei konservative går hardt ut mot planane.
– Planane trugar rettane til fiskarar og turoperatørar, seier han.
Ifølgje Burke startar forhandlingane med fiskenæringa, som truleg vil få store summar i kompensasjon. Forhandlingane skal gå føre seg over to månader.
(NTB/NRK)