– President Assad bør etter mi meining vere ein kandidat til valet, men han vil sjølv avgjere om han skal stille når tida er inne, seier viseutanriksminister i Syria, Faisal Muqdad til nyheitsbyrået AFP.
Kritiserer Assad sine utsegn
Den syriske ministeren seier at ingen har rett til å seie om Assad kan stille eller ikkje. Med det svarer han på det hans russiske kollega uttalte før i dag.
– Å kome med slike utsegn gjer berre atmosfæren tyngre og bidreg ikkje til å roe ned situasjonen, sa viseutanriksminister i Russland, Mikhail Bogdanov, tidlegare i dag. Russland har lenge vore ein av støttespelarane til regimet i Syria.
Utsegna som Bogdanov viser til er Bashar al-Assad sitt utsegn om at han «ikkje ser noko grunn til at han ikkje kan stille som kandidat til neste val». Dette har skapt stor misnøye blant opposisjonen i Syria, eit land kor 125.000 menneske har mista livet dei siste åra, og fleire millionar har blitt drive på flukt.
Det har kome vekslande meldingar frå regimet i Syria om Assads planar om å stille til val, og det er framleis ikkje stadfesta at han faktisk stiller.
- LES OGSÅ:
- LES OGSÅ:
Samanliknar Assad og Hollande
Bogdanov sa at både president Assad, men også alle andre partar bør ta ansvar og unngå moglege konfliktfylte tema i framkant av dei planlagde samtalane i Genève i januar.
– Me meiner at det i framkant av fredssamtalane ikkje bør kome nokre utsegn som andre kan mislike og som kan skape sterke kjensler og reaksjonar, sa Bogdanov.
- LES OGSÅ:
Den syriske viseutanriksministeren viste til Frankrike då han argumenterte for kvifor Assad bør få stille på nytt.
– Stemmeurnene vil bestemme kven som skal styre i Syria. President Assad har eit stort fleirtal bak seg medan president Hollande berre har støtte frå 15 prosent av det franske folk, seier Muqdad.