Han var på lufta i over 70 timar i strekk under dei dramatiske desemberdagane i 1989. Teodor Brates var viseredaktør for rumensk kringkasting si nyheitsavdeling dei siste åra diktatoren Nicolae Ceausescu regjerte.
Og det var han som kunngjorde at Ceausescu og kona Elena hadde blitt arrestert.
– Skapte ei nasjonal psykose
Denne veka var Brates sikta for å spreie massiv feilinformasjon til nasjonen som sat klistra til fjernsynet for å finne ut kva det var som skjedde.
Brates er saman med mellom anna tidlegare president Ion Iliescu sikta for brotsverk mot menneskeslekta.
– Brates sa at terroristar kom for å skyte folk, og at drikkevatnet var forgifta, seier statsadvokaten sitt kontor.
Aktoratet meiner Brates hadde ei stor rolle i å spreie falske nyheiter, som førte til stor terrorfrykt, «ei nasjonal psykose», noko som påverka både dei væpna styrkane og vanlege folk.
I dei kaotiske desemberdagane i 1989 var det over tusen menneske som vart drepne. Somme vart skotne av snikskyttarar, andre hamna i krysseld når to militære avdelingar byrja skyte på kvarandre.
– Nyheitene Brates spreidde til sjåarane handla om helikopterangrep, angrep frå fallskjermsoldatar og meldingar om kolonnar av panservogner som var på veg, seier statsadvokaten sitt kontor.
Og legg til:
– Det å repetere slik splittande feilinformasjon, førte til at frykta i befolkninga nådde nye høgder, og han er soleis ei viktig årsak til at så mange menneske døydde.
Brates ville ikkje kommentere skuldingane til sin tidlegare arbeidsgjevar, rumensk kringkasting, da han hadde motteke siktinga.