Domen er eitt år strengare enn aktors påstand på åtte års fengsel.
Tiltalte kjem til å anke domen til lagmannsretten, får NRK opplyst hos forsvarer.
Retten:- Kvinne fylt av åpenbar frykt
Heilt sidan han vart arrestert og varetektsfengsla i april i fjor, har tiltalte halde fast ved at han ikkje er skuldig i valdtekt. Han la ikkje skjul på at han hadde eit aktivt seksualliv med fleire kvinner der det også vart praktisert BDSM-sex.
–Det var frivillig, men røff sex, sa sikta då han forklarte seg i fengslingsmøte i mai i fjor.
Trøndelag tingrett trur ikkje på tiltalte si forklaring om at dette var frivillig heile vegen.
Saka vaks under etterforskinga då fleire kvinner melde seg for politiet. På eit tidspunkt var han sikta for åtte valdtekter mot fem ulike kvinner i Trondheim.
Fleire av sakene vart lagt bort i mangel på bevis.
Han vart tiltala for å ha valdteke ei kvinne ein gong, og sambuaren sin tre gonger.
I husværet hadde han eit eige rom som han kalla «sexrommet».
Her var det ein gapestokk der kvinnene kunne låsast fast.
Dei to fornærma kvinnene samtykka til sex, men tiltalte gjekk lenger enn det som var avtalt, ifølgje tiltalen.
Sambuaren var låst fast til gapestokken ved alle dei tre høva.
Filma utan at kvinnene visste om det
Under etterforskinga fann politiet fleire skjulte små kamera på «sexrommet». Nokre var fastmonterte, andre kunne flyttast på.
Eitt av kamera var på undersida av gapestokken, eit anna på ein lyskastar ved sidan av.
Opptaka lagra tiltalte på server. Om lag 1000 timar med film vart funne der.
Under rettssaka fekk tingretten sjå fire av videoane med fornærma og tiltalte. Det som visast der er delvis også skildra i tiltalen.
Tiltalte fortalde ikkje kvinnene om den skjulte filminga på «sexrommet». Derfor vart han også tiltalt for seksuelt krenkande framferd mot tre kvinner som er filma, noko han tidleg erklærte seg skuldig i.
Høyrer ikkje noko stopp-ord på videoane
Tiltalte forklarte at det alltid var avtalt eit stopp-ord mellom partane når dei hadde sex. Ordet var «raudt» i følgje tiltalte. Ingen av kvinnene som vitna kjende til dette.
Sambuaren som var fastlåst forklarte i retten at ho heller ikkje visste korleis ho sjølv kunne kome seg ut av gapestokken, slik tiltalte meinte var tilfelle.
Andre videoer viser kvinner som låser seg ut av gapestokken. Dette kan ikkje brukast som bevis for at sambuaren visste korleis ho skulle gjere det.
At fornærma frivillig plasserte seg i gapestokken kan heller ikkje føre til lågare straff, påpeikar retten.
Tiltalte må betale 300 tusen kroner i oppreisningserstatning til den tidlegare sambuaren og 240 tusen kroner til den andre fornærma kvinna.
Stort beslag av skjulte kamera
Politiet fann mange små kamera då dei ransaka husværet til tiltalte, dei fleste på sexrommet.
Som ein del av domen blir desse inndregne til Staten.
Tiltalte hadde mellom anna briller, flaske, USB-leidningar, ladekablar, røykvarslar, klesknaggar, bilnøklar, minnepinnar, klokker og lyspære med kamera.
Også eit jakkemerke, såkalla button, med smilefjes hadde eit skjult kamera, viser lista.