Frostating lagmannsrett dømte fredag ettermiddag den 25 år gamle kvinna til elleve års fengsel for drap på si tre år og ni månader gamle stedotter i Trondheim 5. november 2002.
I tillegg er 25-åringen dømt til å betale 200 000 kroner i erstatning og oppreising til jentas biologiske mor.
Aktor Kaia Strandjord hadde lagt ned påstand om 12 års fengsel for den 25 år gamle kvinna.
Stemora var ikkje tilstades i retten fredag, ho blei lagt inn på sjukehus torsdag.
– Ho er urettvist dømt. Det blir kalla justismord. Sånn som eg har opplevd denne saka, har ho vist si uskuld og at dette var ei ulykke, sa forsvarar Venil Katharina Thiis til pressen etter at dommen var opplest i Trondheim tinghus fredag ettermiddag.
Måtte møte
Lagdommar Randi Grøndalen gav 25-åringen ordre om å møte i retten fredag klokka 15:00. Dette fekk kvinna beskjed om i bustaden sin onsdag kveld.
Men då dommen skulle offentleggjerast klokka 15:00, opplyste Grøndalen at Frostating lagmannsrett hadde fått ei legeerklæring der det stod at stemora er lagt inn på medisinsk avdeling på St. Olavs Hospital. Ho blir i alle fall verande der til i laurdag.
I følgje politiadvokat Heidi Melø vil politiet først etter at premissane i dommen er klare avgjere om dei skal varetektsfengsle stemora.
Foto: arkiv
Funnen skuldig onsdag
Rett før klokka 12:30 onsdag slo juryen i Frostating lagmannsrett fast at den 25 år gamle kvinna drepte stedottera si i heimen på Lade i Trondheim 5. november 2002.
25-åringen har forklart i retten at dødsfallet skuldast ei ulykke der ho fall i ei trapp, besvimte, og blei liggande oppå den vesle jenta slik at barnet ble kvelt og døydde.
Kvinna var ikkje sjølv tilstades då rettsavgjerda blei lest opp av juryens ordførar.
Ektemannen reiste saman med forsvararen rett heim til den 25 år gamle kvinna etter at juryen hadde svart ja på skuldspørsmålet.
Anka til Høgsterett
Kvinna er også tidlegare dømt. Ho blei dømt til 12 års fengsel i Trondheim tingrett i november i fjor.
Stemora har allereie anka saka til Høgsterett.
Eitt av ankepunkta er at kvinnas helsemessige tilstand er så dårleg at ho ikkje har klart å forklare seg i lagmannsretten. Ho har heller ikkje vore tilstades under bevisføringa.
Lagretten fann det tilstrekkelig bevist at kvinna med forsett kvelte den vesle jenta i heimen til familien.