Tidlegare i veka var det kun traktor som kunne komme seg fram i flaumområda.
Foto: Karin Jegtvik / NRKFylkesveg 17, både gjennom Vassbotna i Høylandet, og ved Skogmo i Overhalla, vart åpna laurdag formiddag.
Vikavegen til Vassbotna er framleis stengt, men vasstanden i Høylandsvassdraget er på tur ned, melder Høylandet kommune på heimesida si.
Veidekke vurderer stadig når Vikavegen kan bli åpna att.
Oppheva kriseleiinga fredag
Ordførar i Høylandet kommune, Hege Nordheim-Viken, er glad for at situasjonen har roa seg.
– Vi oppheva kriseleiinga i kommunen i går, da flaumen stabiliserte seg. Framleis er det ei grend som er isolert på grunn av flaumen, men dei kan komme seg fram med traktor sjølv om det står vatn på vegen, seier ho.
Nordheim-Viken rekner med at kommunen får ei stor oppgåve med å sjekke tilstanden på dei kommunale vegane når vatnet forsvinn.
– Det blir nok ein god del opprydding, både på vegane våre og dei fylkeskommunale vegane, seier ho.
Dramatisk i flaumområda
Flaumen kom onsdag denne veka, først steig Namsen, så kom dei mindre elvene i Namdalen.
Fleire vegar vart stengde, og folk vart isolert på grunn av flaumen.
Aller verst gjekk det ut over dei som bur på garden Rydningsodden på Høylandet. Dei var isolert på grunn av flaumen, og da dei skulle pumpe ut vatn frå kjellaren, tok pumpa fyr.
Huset brann ned til grunnen, paradoksalt nok måtte brannfolka bli frakta i båt for å komme seg til brannen.
