Senja éin av fem nominerte til IMDi sin sin busettings- og integreringspris 2025

Integrerings- og mangfaldsdirektoratet (IMDi) deler kvart år ut pris til den kommunen som det siste året har utmerka seg i korleis dei tar imot flyktningar.

Måndag blei det klart kva slags kommunar som kan få tittelen for 2025.

Det er Senja i Troms, Sykkylven i Møre og Romsdal, Øygarden i Vestland, Moss i Østfold og bydelen Grünerløkka i Oslo.

Varaordførar Marit Stubberud Hanssen er stolt over at Senja er den einaste nominerte frå Nord-Noreg.

– Vi er veldig glade og stolte over nominasjonen. Vi har busett mange flyktningar i kommunen vår, særleg sidan krigen braut ut i Ukraina. Men tala vi hadde på busetting låg også høgt før det, seier ho.

Les også: Færre flyktningar i 2025 – behovet for busetting har falt 33 prosent.

Busett færre i år

I grunngjevinga til juryen trekk dei fram at Senja har lukkast med å busette flyktningar også utanfor bykjernen.

– Vi har prioritert å ha ei desentralisert struktur på vaksenopplæringa. Vi har opplæring både i Senjahopen og Stonglangseidet, i tillegg til i byen på Finnsnes. Det gjer at vi kan ha ei fleksibilitet på løysningar. Det både med tanke på busetting og oppfølging for at den enkelte skal komme i jobb eller utdanning, seier ho.

Dette seier juryen om dei nominerte

Senja kommune har tatt imot flyktningar frå ulike land og med ulike behov. Kommunen har blant anna busett folk med ulike helseutfordringar, personar med låg utdanning eller manglande arbeidslivserfaring. Det har blitt jobba strukturert, koordinert og godt for å busette flyktningar. Det er gitt praktisk opplæring i «bukompetanse» (for eksempel korleis bruke ulike kvitevarer), sosiale ferdigheiter og reglar som bebuar i eit nabolag, og rettleiing i økonomi. Kommunen har store avstandar mellom bygdene og tilbyr vaksenopplæring på tre stader. Det blir samarbeidd tett mellom Nav, lokalt næringsliv og private aktørar om opplæring, kurs, praksis og arbeid. Senja er også med i KS-nettverket «Flyktningar i jobb» og har eit godt samarbeid med det frivillige.

Bydel Grünerløkka i Oslo kommune er kreative i bustadløysingane sine. Her er det blant anna fleire titals kollektiv for einslege flyktningar. Det blir samarbeidd tett med Nav, Vaksenopplæringa og arbeidsgivarar for å auke sysselsettinga og sørge for god integrering. Bydelen har fått imponerande mange kvinner ut i jobb.

Moss kommune har tatt imot mange flyktningar, og særleg umerka seg i busetting av einslege mindreårige (barn under 18 år som kjem utan foreldre til landet). Det blir lagt til rette for arbeidspraksis frå dag éin. Det har hatt effekt: fleire kjem raskt i jobb. Det kan også visast til gode resultat blant kvinnene.

Sykkylven kan vise til ei fleksibel og rask busetting av flyktningar. Dei som kjem til kommunen, får god oppfølging. Her er det eit tett samspel med det lokale næringslivet. Særleg har samarbeidd mellom Nav, hjørnesteinsbedrifta Ekornes AS, og Flyktningtenesta resultert i mange arbeidsplassar.

Øygarden har busett mange kvoteflyktningar, som kommunen gir tett oppfølging og støtte. Godt samarbeid mellom Flyktningtenesta og Nav har gitt resultat, og fått fleire ut i jobb. Kommunen har sett i verk prosjektet «Jobbsjansen» som gir praksis til kvinner med lite utdanning og jobberfaring.

Men kommunen har også utfordringar.

Varaordføraren oppsummerer den største utfordringa med eit ord:

– Bustadar!

For samstundes som kommunen er nominert til pris for arbeid for flyktningar, måtte Senja seie nei til å busette like mange som det var ønska.

– Skal ta vare på dei som kjem

På starten av året sa kommunen ja til å busette 120 flyktningar, inkludert fem einslege mindreårige i 2025. Det var 30 mindre enn IMDi hadde bede om. Det er også like mange som Harstad, den nest største kommunen Troms sa ja til.

Dei tre åra før det busette Senja høvesvis 197, 204 og 170 flyktningar.

Kor mange flyktningar Senja blir bedne om og dei klarar å busette neste år, er ikkje kjent enno.

Årsaka til nedgangen i 2025 var mangel på bustadar og ledige fastlegeplassar, ifølge vedtaket som blei fatta i mars.

– Vi skal sjå alle og ta vare på dei som kjem. Spesielt sidan vi har busett så mange, er bustadar utfordrande for oss, seier ho.

Les også Må samle reisepenger til NM på Spleis: – Vi skal finne en løsning og vi skal reise

– Til inspirasjon for andre

Likevel har innsatsen som har blitt lagt ned for busetting og integrering av flyktningar, vore på eit topp fem-nivå i landet, ifølge direktoratet – som har dette som ansvarsområde.

Dei er godt fornøgde med tilbodet Senja gir til flyktningane dei har tatt imot.

Fakta om Busettings- og integreringsprisen

Prisen har blitt delt ut årleg sidan 2019 og går til kommunar som har utmerkt seg i arbeidet med busetting og integrering av flyktningar det førre året.

Det er Integrerings- og mangfaldsdirektoratet (Imdi) som deler ut prisen.

Prisutdelinga skjer på IMDi sin årskonferanse i Oslo, 10. november.

Kriterium for å bli nominert:

Kommunen viser engasjement og fleksibilitet i arbeidet med å busette flyktningar.
Det blir jobba aktivt for å få folk ut i utdanning, opplæring og arbeid. Samarbeidet er godt med lokale arbeidsgivarar og frivillige organisasjonar, og det er sett i verk tiltak spesielt retta mot kvinner.
Kommunen skal kunne vise til gode resultat frå introduksjonsprogrammet for flyktningar. (Introduksjonsprogrammet er obligatorisk opplæring, med fokus på norsk språk, samfunnskunnskap, utdanning og arbeidsretta opplæring).

Fakta: IMDi

– Kommunen har jobba godt med å utvikle kapasiteten og tenestene sine for å busette flyktningar med ulike behov. Det same gjeld for einslege flyktningar.

Det seier assisterande direktør i Integrerings- og mangfaldsdirektoratet, Halwan Ibrahim, til NRK.

I ei pressemelding seier direktøren i IMDi, Libe Rieber-Mohn, at det blir gjort viktig flyktningarbeid i dei 357 kommunane i landet.

Ho er tydeleg på at dei fem nominerte til Busettings- og integreringsprisen 2025 har utmerka seg.

– Vi ønsker å løfte fram den gode innsatsen og resultata dei nominerte kan vise til. Dette er til inspirasjon for andre, seier ho.

Prisen blir delt ut 10. november i Oslo.

Marit Stubberud Hanssen i Senja deler gjerne kva ho tenkjer dei har lukkast med.

– Sjå på dei busette flyktningane på same måte som andre nye innbyggjarar. Dei er ein ressurs som kan bidra i lokalsamfunna deira. Dei kan vere med å løyse mange av fellesskapet og næringslivet sine oppgåver, seier ho.