Jon (75) er for gamal til å få TT-kort

– Eg vart både skuffa og overraska da eg fekk avslag på søknaden, seier Jon Hommo.

Han og kona Gudrund klarar seg fint sjølve. Men næraste butikk er fem kilometer unna og apoteket er enda lenger vekk. Sidan Jon ikkje har fått fornya førarkortet, er dei avhengige av drosje for å koma seg ut. Men da Jon søkte om å få TT-kort, sa kommunen nei.

– Eg er redd vi må flytte nærare sentrum. Men vi har jo ikkje lyst til det, seier Gudrund Hommo.

Ekteparet likar å reise på kaféturar og å vera sosiale, men minstepensjonen strekk ikkje alltid til.

– Vi likar å kose oss, men det blir vanskeleg nå. Når det kostar 400 kroner med drosje for å reise til kafeen, så blir det ein dyr kaffikopp. Ofte blir vi berre heime i staden for, seier Jon Hommo.

– Aldersdiskriminering

Kristin Ruud i Pensjonistforbundet seier det er stor skilnad på TT-ordninga ulike stader i landet.

– Ordninga varierer frå fylke til fylke. Det er ikkje nasjonale retningsliner, dermed blir det opp til kvart fylke å bestemme villkåra for kven som har rett på tilbodet.

I Oslo får innbyggjarar over 67 år 70 turar årleg dersom dei ikkje kan nytte det vanlege kollektivtilbodet. I Telemark får den same gruppa null turar.

– Vi meiner det er aldersdiskriminerande, og vi ser ikkje bort ifrå at dette er brot på diskrimineringslova, seier Ruud.

Ikkje kommunale reglar

Ordførar i Vinje, Jon Rikard Kleven, seier kommunen ikkje kan vera illojal mot reglane som kjem frå fylkeskommunen.

– Eg oppfattar at regelen frå fylkeskommunen gjeld dei som er innanfor yrkesaktiv alder. Men eg kjenner ikkje til grunngjevinga for regelverket.

– Ein har vel behov for å reise og vera aktiv også etter ein er ferdig med yrkeslivet?

– Heilt klart. Eg går ut ifrå at det er eit kostnadsspørsmål når ein ikkje har TT-ordninga for pensjonistar.

Har andre ordningar

Fylkesordførar Sven Tore Løkslid seier at når du blir 67 år så kjem du inn under andre ordningar enn TT-ordninga.

– Pensjonistar kjem inn under ei ordning med honnørbillett på kollektivtrafikk. I tillegg har vi ei ordning som heiter flexiruter.

Flexiruter er ein del av kollektivtilbodet, der du kan bestille transport til og frå heimen på faste dagar. Problemet er at mange ikkje kjenner denne ordninga, og Løkslid seier at dei jobbar for å synleggjere dette tilbodet.

Men ekteparet Hommo har ikkje fått noko informasjon om andre ordningar korkje frå dei som handsama saka i kommunen eller frå helsepersonell.

– Eg synest det er heilt hol i hovudet, seier Gudrund.

• Les også: Forskjellsbehandler funksjonshemmede
• Les også: – Opprørende, tullete og høl i hue