Etter 17 år med snøskuterkurs fekk Vest-Telemark vidaregåande skule på Dalen den sjokkerande nyheita.
Dei fekk ikkje lenger lov til å halde det populære kurset.
Årsaka til avslaget var at skulen ikkje tilbyr studiar relatert til reinsdyr eller reindrift.
No har Vegdirektoratet overprøvd vedtaket frå Statens vegvesen.
– Vi har kjempa ein lang kamp for å få løyvet tilbake, så nå er vi skikkeleg glade, seier rektor ved Vest-Telemark vidaregåande skule, Siv Reidun Eide.
Ein lang kamp
I fem månader har skulen, ordførar, fylkeskommunen og Statkraft jobba på spreng med å klage på vedtaket.
Det var derfor ein gledas dag då det onsdag blei klart at skulen får lov til å halde kurset igjen.
– Det betyr mykje for elevar og regionen rundt, fortel Eide og legg til:
– Det betrar trafikksikkerheita heilt klart når elevane får nødvendig teoriopplæring og den praksisen som trengst for å handtere skuteren på ein trygg måte.
Eit heilt spesielt tilfelle
I det nye vedtaket frå Vegdirektoratet går det fram at skulen får tilbake løyvet, fordi det er eit stort behov for snøskuteropplæring i regionen.
Vegdirektoratet anerkjenner i vedtaket at skulen har bygd opp eit solid tilbod i lokalsamfunnet i løpet av åra dei har tilbode opplæringa.
«Det er tydeleg at dei har god støtte frå viktige aktørar og dei har eit godt renommé. Fleire viktige bedrifter i nærområdet og personar i lokalsamfunnet nyttar seg av tilbodet», heiter det i vedtaket.
Vegdirektoratet understrekar at dette er eit spesielt tilfelle, sidan skulen har bygd seg opp kompetanse og erfaring på området.
«Dersom det ikkje blir gitt unntak i denne spesielle saka, vil det få uheldige konsekvensar for svært mange involverte», skriv Vegdirektoratet.
Opplæringa vil vere tilbake til hausten
Ordførar i Tokke kommune, Jarand Felland meiner god praksis over lang tid og eigna område var årsaka til at skulen nå får halde fram med å vere kursarrangør.
– Kurset frå Vest-Telemark vidaregåande har vore hovudområdet for fleire fylke i forhold til snøskuteropplæring, så folk har komme langvegs for nettopp dette kurset.
Sjølv blei han svært glad over nyheita.
– Det var veldig godt å sjå at dei gode argumenta vi har fekk gjennomslag.
Nå håpar skulen å få kursa tilbake frå hausten av.
– Vi brettar opp ermane og jobbar for å få kursa på beina igjen, då kan det hende vi køyrer til med ei heidundrande feiring, avsluttar Eide.