– Guttas Campus endra livet mitt. Eg fekk trua på meg sjølv att. Dei sa «legg inn innsatsen, så skal du sjå kva som skjer». Det gjorde eg, og no går det bra!
For han var ikkje akkurat skuleflink før, fortel Muhammed Hammani (16) om seg sjølv.
I heile ni fag på ungdomsskulen fekk han «ikkje vurdert».
No går han fyste året på vidaregåande, og har nesten berre toppkarakterar. Neste år skal han gå administrasjon. Studere vidare etter det igjen. Han er motivert, og har draumar for framtida.
Og no vil enda fleire få den same moglegheita.
Ny sjanse til å lykkes
Byrådet i Oslo har sett av ti millionar kroner til samarbeidet med Guttas Campus.
Det gjer at 200 gutar til kan få delta på læringscampen dei neste fire åra.
– Dette er elevar som står i fare for å falle ut av skolen. No får dei ein ny sjanse til å lykkes med utdanninga si, seier utdanningsbyråd Julie Remen Midtgarden (H).
I mange år har det vore diskusjon og debatt om at gutane går tapande ut i det norske skolesystemet.
Dei scorar dårlegare enn jentene både fagleg og sosialt, noko som og visast i ei rekke statistikkar seinare i livet.
Tidlegare skolebyråd Sunniva Holmås Eidsvoll (SV) seier det er bra det nye byrådet vidarefører samarbeidet med Guttas Campus.
Alternative opplæringsarenaer som Guttas Campus er viktige å ha. Likevel meiner ho at det ikkje monnar med eit tilbod for 50 elevar i året når ein ser på det store biletet.
– Det kan ikkje vere ei unnskyldning for å ha ein stillesittande og teoritung skule for dei som er att.
Byrådsleiar Eirik Lae Solberg (H) seier det ikkje er tvil om at skulen bør tilpassast meir til gutane, og at Guttas Campus er eit bidrag til ei meir praktisk retta undervisning.
– Men bør ein ikkje då og sjå på det grunnleggande i skulen, framfor å bruke læringscampen som ei livline?
– Vi må få til begge deler. Samtidig må vi sikre at elevane har grunnleggande ferdigheiter. At dei kan lese, skrive og rekne. Det får dei bruk for uansett kva dei skal framover.
Betrar både karakterar og karakterstyrker
For Muhammed og Mats er det ikkje berre karakterane på skulen som har endra seg.
Dei har fått meir tru på seg sjølv. Meir sjølvkontroll. Meir engasjement og motivasjon, også i kvardagen.
– Vi ser utviklinga frå dei kjem med capsen på og hetta ned i panna. I løpet av nokre dagar rettar dei ryggen, fortel Omar Mekki, dagleg leiar og rektor på Guttas Campus.
Hovudnøkkelen er å ta gutane heilt ut av den vanlege situasjonen, sette dei saman med andre som er like dei, og ha eit opplegg som treff, meiner Mekki.
– Då kan det skje magiske ting på kort tid!
– Statistikken seier at ein ungdom som ikkje fullfører vidaregåande og kjem seg i arbeid kostar samfunnet 17 til 18 millionar kroner. Så samfunnsøkonomisk er det veldig kostbart. Ikkje minst har det store kostnadar for den enkelte guten, seier Mekki.
Bør ha «powerbreaks i skulen»
Mats Krane (15) fortel at han alltid har vore litt bob-bob på skulen.
Han brydde seg ikkje så mykje om framtida. Tenkte han berre fekk «vengje» det, som han seier.
Mats fortel at dei har 90 minutt med rekning, lesing og skriving kvar dag på campen. Så har dei ein fem-minutts powerbreak med ein aktivitet.
– Då fekk du friska opp hjernen, og var klar til å lære meir. Så for min del hadde det hjelpt mykje med powerbreaks i skulen også.
Og korleis ser han og Muhammed på framtida no?
– Den er ljosare. Eg veit kva eg faktisk skal gjere med livet, svarar Mats.
Han skal bli elektrikar. Få ein sikker jobb, løn og ein stad å bu.
Muhammed skal bli lærling, og gå Y-vegen vidare. Draumen er administrasjon og leiing.
– Vil du anbefale andre å bli med på Guttas Campus?
– 100 prosent. Det er det beste som har skjedd meg. Det har hjelpt meg med alt!
Vil du vere med på innsida av Guttas Campus? Sjå «Gutter på Randen» her: