– Det er kult å sette eit avtrykk, seier Nils van der Poel til NRK etter at han akkurat har publisert ei 62-siders avhandling som greier ut om alt han har føreteke seg opp mot sine to OL-gull i Beijing.
Svensken har verkeleg sett sitt preg på skøytesirkuset dei siste to åra, med verdsrekordar, VM-gull, OL-gull og eit veldig uortodoks treningsregime.
Men for han som av mange er rekna som skøytekongen dei siste 15 åra, er van der Poels skriverier av null interesse.
– Nei, og eg er fullstendig uinteressert i det, seier Sven Kramer når NRK spør om han har vore inne på nettstaden howtoskate.se.
– Kvifor?
– Fordi vi i Nederland har vår filosofi og eg tykkjer at eg har gjort det ganske bra dei siste 15 åra. Nils van der Poel gjer det ganske bra no, men det vil overraske meg om han fortset å gjere det bra i 15 år framover, seier mannen med 29 VM-gull og fire OL-gull, og sender med det eit tydeleg stikk til svensken.
Skal lese på flyet heim
Sven Kramers lagkamerat Patrick Roest er ikkje like avvisande til van der Poels skriverier. Han fortel at han fekk ein papirkopi av dei 62-sidene etter medaljeseremonien laurdag, frå van der Poel.
– Eg skal lese det på flyet heim når OL er over. Men akkurat no fokuserer eg på meg sjølv, seier han til NRK.
Roest vart nummer to på både 5000- og 10.000-meteren bak van der Poel. Men sjølv om han ikkje hadde ein sjanse til å slå svensken, så vil han ikkje ta etter han i treninga.
– Det funkar for han, men det ville aldri fungert for meg. Eg trur eg berre hadde vorte dårlegare av å byrje å trene som han, seier Patrick Roest.
- Her kan du lese heile historia om den unike skøyteløparen Nils van der Poel:
Heilt unikt
Etter eitt døgn hadde nettstaden til van der Poel fått nærare 200.000 sidevisningar kunne Sveriges pressesjef Niclas Green opplyse sundag kveld.
Alle som har vore innom har fått sjå gjennom treningsdagboka til van der Poel heilt attende frå mai 2019 og fram til verdsrekorden og OL-gullet på 10.000 meter fredag.
I tillegg har han forklart kvar einaste detalj bak sin treningsfilosofi. Sjølv brukar han orda: «Keep it simple, stupid»
– Eg har aldri sett at nokon har delt så mykje om seg sjølv og treninga si. Og når det i tillegg kjem frå han som er verdas absolutt beste akkurat no, så er det heilt unikt, seier Sondre Skarli.
Han er tidlegare landslagstrenar for Noreg, og no arbeider han som fagkonsulent for uthald ved Olympiatoppen.
Skarli fortel at «alle» i miljøet snakkar om dette dokumentet no.
– Det er nok ufatteleg mykje å lære av dette, men eg vil ikkje anbefale folk å sluke det rått og køyre ein blåkopi, seier han.
Enorme watt-verdiar
Sundag vann Peder Kongshaug, Hallgeir Engebråten og Sverre Lunde Pedersen kvalifiseringa på lagtempo i skøytehallen i Beijing.
Oppladinga til det løpet var å lese van der Poels dokument.
– Det er heilt sjukt. Det er ikkje til å tru, seier 20 år gamle Peder Kongshaug som slukte alle dei 62 sidene ein gong det vart publisert.
Hallgeir Engebråten fortel at han var sjokkert da han fekk sjå treningsdagboka til sin svenske konkurrent.
– Watt-verdiane han har sykla på er jo på nivå med mange proffsyklistar, seier Engebråten.
Watt er enkelt forklart kor mykje kraft ein legg ned i pedalane når ein syklar. Høgare watt betyr at ein legg meir kraft i tråkka sine.
Engebråten får støtte av Sondre Skarli.
– Han hadde hevda seg i NM på sykkel i ei tempoetappe med dei wattverdiane han presenterer. Utfordringa hadde nok vore aerodynamikken i sittestillinga seier han.
NRK har også fått ein professor i bevegelsvitenskap til å vurdere van der Poels treningsopplegg. Den kan du lese her: