19-åringen snur opp ned på VM: – Eit lite mysterium

I VM i enkeltdistansar for tre veker sidan gjorde Stolz reint bord, med overlegne gull på 500, 1000 og 1500 meter.

Amerikanaren gjentok dermed gulltrippelen sin frå VM året før og han tok også verdsrekorden på 1000 meter tidlegare i år.

I vekas sprint- og allround-VM går han likevel ikkje sprint, der dei går 500 meter og 1000 meter to gonger kvar. I staden satsar han fullt på allround, sjølv om det då betyr både 5000 og 10.000 meter, i tillegg til 500 og 1500 meter.

– Eg synest det er utruleg kult at han stiller. Han droppar sprint og veit vel sjølv at han viss han hadde stilt opp der, så hadde han tatt sigeren. Det er kult at han ønsker å utfordre seg sjølv litt meir og stiller på allround. Det blir jo eit ekstremt bra show, seier Sander Eitrem.

Trur Stolz vil leie med 30 sekund

Eitrem er det største norske medaljehåpet for mennene, men på førehand er det «superduellen» mellom Stolz og nederlandske Patrick Roest «heile» skøytemiljøet snakkar om.

Spørsmålet dei fleste no stiller seg er kor stort forsprang Stolz vil ha før den avsluttande 10.000-meteren – og kor mange sekund han treng ned til forfølgarane.

– Eg tippar han nok vil leie med rundt 30 sekund på Roest. Det trur eg eigentleg er nok til å vinne. Ein skal gå ekstremt godt på 10.000 for å ta igjen det, seier Eitrem.

Eksempelvis har Stolz ein personleg rekord på 500 meter som er høvesvis rett over to og tre sekund betre enn Roest og Eitrem. Kalkulert om til 10.000-sekund vil det utgjere i overkant av 40 og 60 sekund.

– Eg bør kunne ta to sekund på 500 meter. Så tape rundt ti sekund på 5000 meter. Då har eg eitt tidspoeng (eitt sekund på 500 meter) igjen. Så håpar eg å ta eit nytt sekund på 1500 meter. Då har eg eit forsprang på 26 sekund før 10.000 meter. Viss Roest går rundt 12.50, så skal det vere mogleg, seier Stolz til NOS.

Stolz har ein personleg rekord på 10.000 meter på 13.17,53 frå Salt Lake City i januar.

Det er også einaste gong han har gått distansen, noko som gjer at det blir potensielt ganske ukjent terreng for Stolz søndag ettermiddag.

Trenaren forbløffa av styrken

Den nøkterne 19-åringen fokuserer sjølv først og fremst på å bli best mogleg. Skal vi tru trenar Corby, finst det ikkje grensar for kva Stolz kan klare.

– Er han det mest unike talentet på planeten?

– Ja, han er verkeleg det. Han trenar veldig hardt. Han er i veldig god form og er heilt utruleg sterk. Det er derfor han går så raskt. Du kan berre ikkje tru kor sterke beina hans er, sa Corby til NRK i Calgary.

Stolz har tidlegare i karrieren blitt samanlikna med blant anna Eric Heiden, amerikanaren som mellom anna blir hugsa for at han som 21-åring vann alle dei fem distansane i OL i Lake Placid i 1980.

I ein skøytesport som blir stadig meir spesialisert, er Stolz den som er nærast å kunne gjere liknande blant dei mannlege skøyteløparane.

Mykje takka vere ei enorm hurtigheit og evne til å bevare farten i svingane.

– Kva gjer han i svingane som ingen andre klarer?

– Det eit lite mysterium. Han er veldig god til å lene seg inn, men andre kan også gjere det. Han er berre så sterk, sa Corby.

Ville gå begge delar

Eit mogleg scenario er også at Stolz kan ha eit forsprang som gjer at han kan tillate seg å bli tatt igjen med ein runde av ein løpar som Roest på 10.000 meter, og då potensielt i parløp.

– Det er kanskje noko av det eg gleder meg mest med til helga, å sjå den duellen på 10.000 meter. Då mest sannsynleg Jordan Stolz mot Patrick Roest. Det blir utruleg gøy, seier Ragne Wiklund, som jaktar medalje for kvinnene.

– Det er utruleg imponerande det han har fått til og det han driv på med og har på gang. Det kan hende vi har mykje å lære, seier Wiklund.

89-åringen som smadrer verdensrekorder

Stolz hadde opphavleg tenkt til å gå både sprint og allround i VM. Etter planen skal Miho Takagi gjere det for kvinnene. Ho er på veg mot siger i sprint-VM-et for kvinner.

I samråd med trenar Bob Corby enda det til slutt med «berre» allround for Stolz.

– Eg kjenner det er ein av dei mest prestisjefylte konkurransane i hurtigløp på skøyter, ved sida av OL. Å vinne det vil vere stort, men Patrick er openbert ein tøff konkurrent, sa Stolz.

PS! Wiklund, Eitrem og resten av det norske laget jaktar det første norske allroundgullet sidan Johann Olav Koss vann VM i 1994. Sjukdom har øydelagt mykje for det norske landslaget i vinter, men det norske laget melder om ei sjukdomsfri oppkøyring inn mot VM.

null

Spiller nå

Scorer fra egen banehalvdel (!) 00:28

Neste

Sjå monsterhoppet til Kobayashi 00:25 Gikk på kjempesmell på direkten – må tatovere seg! 01:31 Paris-politiet «rydder» gatene for migranter før OL 00:54

Vis flere