Ingen United-manager har lågare sigersprosent enn Solskjær sidan Dave Sexton. Som fekk sparken sommaren 1981. Det er nesten 40 år sidan.
Men det får ikkje United-fansen til å vende seg mot nordmannen, ifølgje dagleg leiar i Manchester Uniteds skandinaviske supporterklubb, Bernt Hjørnevik.
– Det er absolutt ingen indikasjonar på at fansen vender ryggen til Solskjær, seier Hjørnevik.
Sigersprosenten til United sidan Ole Gunnar Solskjær blei manager i klubben like før jula 2018, er lågast av alle managerane sidan før Alex Ferguson.
Det trur ikkje Hjørnevik betyr all verda for supporterane.
– Fansen har meir og meir forstått at problema dei siste åra er så mykje meir samansette. Dei har iallfall fått ein manager som har ei tydeleg retning og plan, og som gir unggutane sjansar.
Med Solskjær som manager har United ein sigersprosent på like over 47. Det har blitt 24 sigrar på 51 kampar.
Det er like mange kampar som David Moyes – Alex Fergusons etterfølgjar – fekk før han blei sparka. Han hadde ein sigersprosent på nesten 53.
Sidan Solskjær fekk United-jobben fast 28. mars i fjor, har han ein sigersprosent på 31,2 – 10 sigrar på 32 kampar.
Fjerdeplassen viktigast
Men Hjørnevik er ikkje veldig oppteken av det. Han meiner at ein framleis må vente varierande resultat, og at det viktigaste uansett er fjerdeplassen ved sesongslutt i mai.
– Om det betyr færre poeng enn i fjor, er irrelevant, seier Hjørnevik.
Manchester United er nummer fem i Premier League, fem poeng bak Chelsea.
Dette er sigersprosenten til dei siste United-managerane (alle turneringar):
- Alex Ferguson (1986–2013) – 59,67 (897 sigrar på 1503 kampar)
- José Mourinho (2016-2018 – 58,33 (84 sigrar på 144 kampar)
- David Moyes (2013–2014) – 52,94 (27 sigrar på 51 kampar)
- Louis van Gaal (2014–2016) – 52,43 (54 sigrar på 103 kampar)
- Ron Atkinson (1981–1986) – 49,32 (146 sigrar på 296 kampar)
- Ole Gunnar Solskjær (2018 –?) 47,05 (24 sigrar på 51 kampar)
Og for samanliknings skuld: Sir Matt Busby (1945-1969 og (1970–1971) – 50,52 (576 sigrar på 1140 kampar).
– Desse tala er sjølvsagt ikkje som dei burde vere. Men vi må sjå litt bak tala også. Det viktigaste for oss er å sjå ein framgang i det spelemessige.
– Har de sett den framgangen?
– Ser vi heile året under eitt, har vi slått ut PSG på bortebane, vi har slått Tottenham, vi har slått City, og vi er einaste laget som har teke poeng mot Liverpool. Det viser at det ligg noko der. Så har vi store utfordringar mot lag som ligg lågare på bana, seier Hjørnevik.
– Saknar plan B
Det er ein del eksempel på det: United hadde aldri tapt heime mot Cardiff og Crystal Palace før under Solskjær. Bournemouth hadde gått ni kampar utan tap, Watford var utan heimesiger sidan februar, og Arsenal hadde tapt sine fire siste heimekampar, ifølgje statistikk frå nettstaden news-af.feednews.com.
Før dei alle snudde desse statistikkane mot United.
– Eg har sagt lenge at vi saknar ein tydeleg plan B når vi møter lag som legg seg bakpå og vil kontre, seier Hjørnevik.
United slit med skader, derfor håpar Hjørnevik at Solskjær i overgangsvindauget i januar går litt bort frå sine prinsipp om å tenke berre langsiktig.
– Med både Pogba og McTominay ute må vi få inn ein midtbanespelar på kort sikt. Vi er veldig sårbare på midtbanen, og det kan bli avgjerande.
NRKs ekspert Morten Morrisbak Skjønsberg medgir at han ikkje er imponert av Uniteds spel mot etablert forsvar.
– Det er det vanskelegaste i fotball. Det er lett å forsvare seg, og tilsvarande vanskeleg å skape noko mot lag som forsvarar seg godt. Det er ikkje United særleg gode til no. Det kan godt hende dei treng nye folk på midten, ikkje minst med dei to skadane, seier Skjønsberg.
Eit anna poeng som mange peikar på som eit problem, er at United ser ut til å vere svært avhengig av straffer. Berre to av kampane har gitt United siger utan straffespark, ifølgje VG.
Endå ein rekord Solskjær ikkje vil ha: Det tok United 20 kampar å sanke 30 poeng denne sesongen. Det er 30 år sidan United brukte fleire kampar – då brukte dei 27.
Dei siste sesongane:
- 2018/19: 19 kampar
- 2017/18: 14 kampar
- 2016/17: 17 kampar
- 2015/16: 19 kampar
- 2014/15: 16 kampar
- 2013/14: 18 kampar
- 2012/13: 13 kampar
- 2011/12: 13 kampar
- 2010/11: 15 kampar
- 2009/10: 14 kampar
- 2008/09: 15 kampar
- 2007/08: 13 kampar
- 2006/07: 12 kampar:
- 2005/06: 14 kampar
- 2004/05: 16 kampar
- 2003/04: 13 kampar
- 2002/03: 17 kampar
- 2001/02: 18 kampar
- 2000/01: 13 kampar
- 1999/00: 14 kampar
PS: I sin karriere som manager i Cardiff i 2014, hadde Solskjær ein sigersprosent på 30 – ni sigrar på 30 kampar.
- United møter byrival Manchester City i ligacupens semifinale tysdag kveld kl. 21.00. Følg kampen her.
