Aleksandr Bolsjunov og fleire andre russiske langrennsstjerner startar sesongoppkøyringa på russisk-annekterte Krim, men hevdar det ikkje ligg noko politikk bak treningssamlinga.
Det er stortingsrepresentant Tage Pettersen (H) heilt usamd i.
Som medlem av kultur- og familiekomiteen, har han også ansvar for idrettspolitikk. Han likar dårleg at Aleksandr Bolsjunov og dei andre stjernene reiser til Krim.
Eit område som var kontrollert av Ukraina så seint som i 2014.
– Russarane ser vel på dette som ein del av sitt område. Men all den tid at resten av verda ikkje er samde med dei, så er det jo ein provokasjon, seier Pettersen.
Får kritikk frå Reztsova
Det er treningsgruppa til Jurij Borodavko som har lagt den første treningssamlinga i sesongen til den annekterte halvøya Krim.
Med på samlinga vil utøvarar som Aleksandr Bolsjunov, Natalja Neprjajeva og Julija Stupak delta.
Nettavisen omtalte saka først i Noreg, og til avisa seier Vegard Ulvang, leiar for langrennskomiteen i Det internasjonale Skiforbundet (FIS), at symbolikken er betydeleg.
– Dei er nok mest opptekne av omdømet i Russland, der dei skal vise at sjølv om det går føre seg ein såkalla spesialoperasjon, så gjer ikkje det noko med førebuingane deira, seier Ulvang.
Og det er ikkje berre i Noreg Borodavko og dei russiske langrennsløparane får kritikk.
For den gamle olympiske meisteren Anfisa Reztsova, som ofte uttalar seg i russiske medium, slår hardt tilbake på valet til den kjende trenaren.
– Kvifor bestemte han seg for å ha treningsleiren på Krim? Samlingane burde vere andre stader dei har vore før. Han har ikkje rett. Eg beklagar, men eg forstår ikkje kvifor han gjer dette no, seier Reztsova til Sport-Express.
– Flott stad for trening
Men Jurij Borodavko forstår ikkje kvifor norske ekspertar er kritiske.
– Vi har hatt treningsleirar på Krim sidan 2011, då det framleis var Ukraina. Det er ingen politikk involvert, vi skal berre trene. Krim er ein flott stad for trening, seier Borodavko til Sport-Express.
Pål Kolstø, norsk professor i Russlandstudier ved Universitetet i Oslo, forstår Borodavko og forklarer at Krim-halvøya blir sett på som ein del av Russland for russarar flest.
– Det er så innarbeidd at dei knapt nok opplever dette som ein provokasjon i det heile. Krim er ein flott stad og er ein populær feriestad for russarar. Dei spør seg nok heller kvifor dei ikkje skulle hatt treningssamling der, seier han.
Men idrettspolitikar Tage Pettersen er ikkje samd med professoren.
– Idretten er vel eit av dei områda der Putin nærast personleg har tapt ganske mange ansikt. Vi skal ikkje sjå vekk frå at det er ein reaksjon på det.