Rekordane fall då Kane scora hat trick i målfest: – Vi kan gå heile vegen

– Det er godt å vere VMs toppscorar. Denne ballen er ein lykkeball – éin av dei, sa ein blid Harry Kane om matchballen då FIFA intervjua han etter kampen.

Cristiano Ronaldo og Romelu Lukaku stod med fire mål kvar så langt i VM. Kane viste at han ikkje ville vere noko dårlegare då England møtte Panama.

Med tre mål er England-kapteinen oppe i fem mål så langt. Det er eitt færre enn det VM-toppscoraren James Rodríguez nådde i 2014 og like mange som Diego Forlán, Thomas Müller, Wesley Sneijder og David Villa klarte då dei delte tittelen fire år tidlegare.

Kane vart den første til å score minst to mål i sine to første VM-kampar sidan Polens Grzegorz Lato i 1974. Lato enda opp med å bli toppscorar i den meisterskapen.

Første sidan Lineker

Og som om ikkje det var nok: No er det berre Gary Lineker (10 mål) av engelskmennene som har fleire VM-mål enn Kane.

Apropos Lineker: Harry Kane vart den første spelaren sidan nettopp Lineker i 1986 som scora to og tre mål i to strake VM-kampar.

Også England som lag sette rekordar i storsigeren mot Panama. Dei hadde aldri tidlegare scora fleire enn tre mål i ordinær tid i ein VM-kamp, og aldri fleire enn fire om ein inkluderer EM også.

– Eg trur vi kan gå heile vegen. Men det er mykje hardt arbeid som står igjen før vi kjem så langt, seier Kane til BBC.

– Kan bli Englands år

Kane sitt tredje mål for dagen var forresten eit heller heldig eit. Ruben Loftus-Cheek avslutta via foten til 24-åringen og i mål.

England-spissens andre mål kom på straffe på overtid i andre omgang. Det var Englands femte for dagen.

Heile fem England-spelarar var involvert i 4-0. Kieran Trippier slo eit kort frispark som gjekk klikk-klakk via Jordan Henderson, Harry Kane og Raheem Sterling før John Stones scora sitt andre frå kort hald.

– Eg hadde aldri drøymt om å bli tomålsscorar då eg stod opp i dag, sa John Stones til BBC etter kampen.

3–0 var også eit praktmål. Jesse Lingard spelte vegg med Raheem Sterling før han banka ballen høgt i mål frå om lag 18 meter.

Første sidan Beckham

2–0 kom etter 22 minutt då Kane scora på si første knallharde og presise straffe for dagen.

Det var Englands første straffescoring i VM sidan David Beckham trefte mot Argentina i 2002.

Det var John Stones som scora Englands første for dagen, då han heada inn eit hjørnespark frå Kieran Trippier.

Panama fekk eit trøystemål på stillinga 6-0, noko som gjer at England og Belgia både har like mange poeng og lik målforskjell før dei møter kvarandre i siste gruppespelkamp.

– Det var sjølvsagt kjedeleg at vi fekk det baklengsmålet. Men vi skal angripe når vi møter Belgia. Så får vi sjå kva som skjer, seier Harry Kane.