Reagerer på svar etter «Bakke-henging»: – Mest forkasteleg at dei seier at dette er humor

For det var ein gest mot tidlegare Lillestrøm-trenar Geir Bakke som stal mykje av merksemda etter hatoppgjeret på Åråsen søndag.

På eit stort banner frå heimefansen vart Geir Bakke portrettert hengjande frå ein galge, med «Judas» skriven i panna. Dette som ein takk for sist etter at trenaren forlét LSK og tok jobben som hovudtrenar hos erkerival Vålerenga i sommar.

Overfor VG tok LSKs styreleiar Morten Kokkim det omdiskuterte banneret i forsvar og beskreiv det som «humor».

Skjønar ikkje humor-utspel

Det får Jahn Ivar «Mini» Jakobsen til å reagere. Han likte ikkje gesten, eller banneret, i det heile. Men utsegnene frå LSKs styreleiar vart toppen av kransekaka for den tidlegare landslagsprofilen.

– Eg veit ikkje om eg skal bruke ordet forkasteleg, men det som er mest forkasteleg er at Lillestrøm seier at dette er humor. For det er det jo definitivt ikkje, seier Jakobsen.

Han held fram:

– Ser ein på reaksjonane i ettertid, ser ein at dette ikkje er humor i det heile tatt, seier den tidlegare fotballprofilen.

Jakobsen seier at han skjønner at Lillestrøm-supporterane faktisk ikkje ønskjer at Vålerenga-trenaren skal døy, men meiner det kan sende eit feil signal til unge.

I tillegg trekkjer han også fram timinga, få dagar etter at to svenskar vart skotne og drepne i Brussel, rett i forkant av kampen mellom Belgia og Sverige.

Summen av det gjer at Lillestrøm burde reagert, meiner Jakobsen.

– Eg meiner spesielt klubben berre burde leggje seg flat og seie «beklagar, dette var ei feilvurdering frå oss».

I ein SMS til NRK svarer styreleiar Kokkim på kritikken:

– Så lenge tilskodarar på Åråsen, både bortesupporterar og heimesupporterar, held seg innanfor det som er lovlege ytringar, så skal det veldig mykje til for at vi kan, eller skal, gå inn og sensurere desse. Ut over det har vi ikkje meir å leggje til i denne debatten.

– Ikkje akseptabelt

Jakobsen er klar i sin tale når han meiner at NFF burde gi Lillestrøm ei irettesetjing.

– Eg meiner at det ikkje er akseptabelt at ein supporterklubb og ein klubb skal akseptere slikt. Eg meiner det er langt over grensa for kva vi skal utsetje dei unge supporterane våre for, seier han.

– Eg synest det er synd at Lillestrøm ikkje tek avstand frå det, samanfattar Jakobsen.

Hovudpersonen sjølv, Geir Bakke, meinte det heile var innanfor.

– Eg hadde tre og eit halvt fine år her, med den galne gjengen der i ryggen, og no har eg valt å stille meg utanfor. Eg aksepterer det, det er greitt, sa Bakke til NRK søndag.

I tillegg til banneret, song også Lillestrøm-supporterane «etter matchen skal du døy». Til VG fortalde Kokkim søndag at han ikkje høyrde songen, men at han meinte at supporterane kunne spart seg for det.

Generalsekretæren i Noregs Fotballforbund, Karl-Petter Løken, uttalte søndag at dei meinte det heile vart litt for mykje.

– Vi skal tole ein dryg sarkastisk tone, men kombinasjonen banner, tifo og song om at «etter kampen skal du døy» vart etter vårt syn for mykje og gir eit upassande signal til alle som følgjer norsk fotball, skreiv Løken til VG.

Også VGs Leif Welhaven reagerer på det som skjedde på Åråsen søndag. I ein kommentar hjå eiga avis kallar han det heile for pinleg og patetisk.

Overfor NRK utdjupar Welhaven synet sitt:

– Ein blir skuffa over LSK som klubb. Det er eit arrangement, og ein fotballkamp skal vere for alle. Også barn. Det er utanfor grensa for kva vi må tole å sjå på norske tribunar, meiner han.

– Det er heilt innanfor

Ole Kristian Sandvik er talsmann i Norsk Supporterallianse (NSA), men også Vålerenga-supporter og varamedlem i styret til Vålerenga Fotball Elite.

Han har eit anna syn på saka enn Jakobsen, og det trass i å vere tilhengjar av dei blå.

– Det er sjølvsagt kjipt som Vålerenga-supporter. Det kjem jo mot eigen trenar, men som fotballsupporter, så høyrer sånt heime på norske stadion, meiner Sandvik.

– Det var sterke kjensler knytt til denne kampen, spesielt for LSK-fansen. Det er heilt innanfor, og eg synest ein må tole såpass, legg han til.

Åtvarar mot å flytte på grensene

NRK har vore i kontakt med Norsk Fotballtrenerforening. Dei fortel at dei har teke kontakt med Geir Bakke etter hendinga på Åråsen søndag, men at dei vil ikkje uttale seg om den konkrete situasjonen.

Likevel er dei tydeleg på at det er ei grense på kva som er greitt.

– Hets høyrer ikkje heime i idretten. Grensene kan ikkje berre bli flytta på, for kvar er vi då om fem år, spør styreleiar i NFT, Dag Opjordsmoen, retorisk overfor NRK.