Qatarsk TV hånte Tysklands VM-smell: – Ser ikkje ut som dei bryr seg

Sekvensen frå TV-sendinga til det qatarske TV-selskapet Alkass – som det siste døgnet har gått viralt på sosiale medium – har fått fleire til å reagere.

Videoen viser fleire personar, som er i eit slags studio, som tilsynelatande harselerer med Tyskland etter at dei rauk ut av VM til trass for ein 4-2-siger mot Costa Rica.

På skjermen kan ein sjå personane i det qatarske programmet halde seg for munnen, medan dei vinkar med hendene.

– Det synest eg er dårleg stil. I alle fall frå eit arrangørland, så dei bør halde seg for god for det, seier NRK-ekspert Åge Hareide.

Meiner dei ikkje bryr seg

Mange går ut frå at dette er eit syrleg stikk mot Tyskland etter markeringane dei hadde tidlegare i meisterskapen.

Før Tysklands VM-opningskamp mot Japan markerte laget sin skuffelse over Fifa ved å halde seg for munnen då det offisielle lagbiletet vart teke.

– Det ser ikkje ut som dei bryr seg så mykje om dei signala Tyskland har sendt då. Det var ikkje spesielt til Qatar, men til Fifa. Så tek Qatar dette og ironiserer over det når Tyskland er ute, forklarer Hareide og er oppgitt over bileta frå TV-studioet.

Kritikken mot Fifa kom mellom anna i kjølvatnet av at dei nekta europeiske land sine kapteinar å bere Onelove-armbindet i fargane til regnbogen.

NRK har sendt ein førespurnad til Alkass, men har førebels ikkje fått svar.

– Skadefryd

NRK-ekspert Kristoffer Løkberg trur personane koser seg med Tysklands VM-avskjed, på bakgrunn av kritikken dei har komme med mot landet. Onelove-kampanjen står opp mot diskriminering og brukar aktivt regnbogefargar for å vise solidaritet med LGBT-miljøet. I Qatar er homofili forboden.

– God gammaldags skadefryd, seier Løkberg.

Han er kritisk til at ein tek imot den tyske bodskapen på den måten, i staden for å vere klar over «kva tyskarane symboliserer og kva som er den viktige bodskapen».

Mari Norbakk, postdoktor ved Christian Michelsens institutt, seier følgjande om hendinga i TV-studioet.

– Eg ser det som ei vidareføring av latterleggjeringa av Tyskland, der enkelte fans og andre (og her då i studio) har gjort narr av markeringa til det tyske laget og sagt at dei skulle konsentrert seg om fotball, ikkje politikk så hadde dei kanskje gjort det betre, seier ho.

For både Qatar og Tyskland enda VM med ein sportsleg nedtur. Vertslandet Qatar tapte alle dei tre kampane sine, i det som var deira første deltaking i fotball-VM. Tyskland rauk også ut av gruppespelet, noko dei også gjorde i VM for fire år sidan.

Det tyske laget markerte berre før den første kampen i gruppespelet (mot Japan, som dei tapte 1-2). Etter kampen mot Spania nokre dagar seinare, sa Tysklands midtbanestjerne Ilkay Gündogan at «det politiske er over», og at det no handla om fotball.

– Vi hadde nokre spelarar som var sinte på Fifa. Dei var skuffa og frustrerte, så vi hadde ein diskusjon internt. Til slutt bestemde vi oss for å gjere ein gest mot Fifa. Skal du gjere noko, gjer det som eit lag, sa Gündogan ifølgje The Athletic.