Rasar mot stengd nasjonal­anlegg: – Det er heilt elendig

– Det er ganske katastrofe.

Det seier ein oppgitt Vetle Sjåstad Christiansen til NRK. Han er ikkje aleine om å vere frustrert over stenginga.

– Eg må berre få sagt at det er heilt elendig av Oslo kommune å ikkje få ut fingeren, rett og slett, seier Tarjei Bø til NRK.

Mens sola skin ute, må skiskyttarane inn under deira første samling. For å skyte må dei nemleg inn i skytehallen ved Noregs idrettshøgskole. Dette er dei beste treningsfasilitetane dei beste skiskyttarane i verda kan få i Oslo akkurat no.

Ingrid Landmark Tandrevold er ein av dei som bruker nasjonalanlegget flittigast. Ho bur berre nokre steinkast frå området, og treningskvardagen hennar har endra seg drastisk etter stenginga.

– Det påverkar meg veldig, openbert. Det er den staden der eg trenar stort sett kvar dag. No får vi ikkje skote der. Det er veldig synd, seier Tandrevold.

Les tilsvaret frå Oslo kommune lengre nede i saka.

Uventa politikontroll

For skytebanen i Holmenkollen blei stengd omgåande 19. oktober. Da gjennomførte politiet ein ikkje varsla kontroll ved anlegget.

Dette merka politiet seg under den uventa kontrollen:

• Det blei observert personar gåande på oversida av standplass mens det gjekk føre seg skyting.
• Det blei tatt kontroll på eit gevær utan eigar på standplass. Eigar av geværet var tilbake på standplass etter eit kvarter.
• Skiforeningen skal ha uttrykt si bekymring for sikkerheita på standplass ved anlegget.

Dagbladet omtalte rapporten først.

– Det er litt vanskeleg å forstå korleis eit nasjonalanlegg i skiskyting er stengt på ubestemt tid, både for oss som har det som jobb og skal trene på stadion der vi går verdscup, men også for skiskyttarrekrutteringa og klubbane som trenar der, seier Tandrevold.

– Sportsleg katastrofe

Etter kontrollen blei det sett opp ein permanent vegg som skal verne mot skot. Da gav politiet dispensasjon for bruk under føresetnad om at fleire område var sperra av og mellombels sikra, skriv Akersposten.

Seinare kom det nye krav frå politiet som forlangte ytterlegare permanente sikringstiltak. Blant anna tiltak som skal sørge for sikkerheita ved vådeskot. Frå april blei nasjonalanlegget på nytt stengt.

– Framover kjem det til å bli ein sportsleg katastrofe rett og slett, seier Christiansen.

Arkitektane som jobbar med Oslobygg ser no på permanente sikringstiltak på standplass ved hjelp av glasvegger, eit gjerde, ny skjermvegg eller terrengvoll.

– Ein må berre ta i eit tak viss det skal bli orden, det hjelper ikkje å skulde på naboen, seier Bø og fortset:

– Det er berre å skjerpe seg litt, seier han.

Rekrutteringsfråfall

Haakon Berg Jensen er senior kommunikasjonsrådgivar for Oslobygg KF. I ein e-post skriv han at det er fleire instansar som må behandle saka før anlegget kan opnast igjen.

– Skytebanen kan opnast raskt etter at vi har fått dispensasjon. Dette krev at endelege planar er godkjente frå politiet. Når det gjeld gjennomføring av nødvendige byggearbeid ser vi for oss eitt tidsløp på åtte til ti veker. Vi søker å tilpasse byggearbeida slik at det vil vere mogleg å trene litt under byggeperioden, skriv han.

Les heile tilsvaret frå Oslo kommune under her:

Dei tre skiskyttarane er raske med å påpeike at dei ikkje lid noka nød på grunn av at nasjonalanlegget er stengt, men at det går hardast utover dei yngre.

– Eg har høyrt om mange skiskyttarar som har slutta i Oslo fordi dei begynner med andre ting når dei ikkje får skyte, seier Bø til.

– Eg kan berre sjå for meg kor mange som droppar skytinga sidan dei ikkje har høve til å enkelt trene på det i Holmenkollen. Det synest eg er synd, seier Christiansen.

– Vi er einige med skiskyttarane, og vi kjenner godt til dei utfordringane barne- og ungdomsutøvarane står i. Vi har god kontakt med skiskyttarforbundet og klubbane som til dagleg bruker anlegget. Tilbakemeldingane deira er at dette er svært uheldig for klubbane og skiskyttarmiljøet, og da spesielt dei unge. Svært mange barn har stått utan eit tilbod og klubbar har meldt om sviktande deltaking på trening, skriv Berg Jensen.