Det melder Norway Chess. Bakgrunnen er at Magnus Carlsen nyleg signaliserte at han vurderte å ikkje stille opp, og Henrik Carlsens facebook-innlegg i dag der han ber om at Stavanger trekkjer seg.
I føremiddag gjorde Stavanger nettopp det.
– Vi er veldig skuffa over utfallet av denne saka. Regionen har stått samla bak dette initiativet og jobba iherdig for å få eit sjakk-VM realisert i Stavanger. Vi er imponert over den profesjonelle og ryddige innsatsen frå Altibox Norway Chess, og er stolte av det ein har bygd opp i vår region, seier Stavanger-ordførar Christine Sagen Helgø og fylkesordførar Solveig Ege Tengesdal i ei pressemelding frå Norway Chess.
Styreleiar for Norway Chess, Kjell Madland, omtaler nådestøytet som «utruleg trist».
– Vi har jobba knallhardt med å få til dette, både i Norge og opp mot Fide (Det internasjonale sjakkforbundet). Vi har kome veldig, veldig langt. Det er veldig trist fordi det kunne blitt tidenes VM i Norge, seier Madland til NRK.
Facebook-utspel
Tidlegare på føremiddagen la Henrik Carlsen ut eit innlegg på Facebook, med kritikk av prosessen fram mot valet av Stavanger som norsk kandidat.
VIL VEKK FRÅ STAVANGER: Henrik Carlsen meiner Stavanger bør trekkjast vekk som norsk søkjarby til neste års sjakk-VM
Foto: Carina Johansen / NTB scanpix– Vi ber om at norsk sjakk og Stavanger legg til side kampen om eit VM på heimebane i denne omgang, og at dei fantastiske arrangørane og støttespelarane i Stavanger likevel held fram med den utmerka tradisjonen Norway Chess, skriv Henrik Carlsen – far til Magnus Carlsen – i eit innlegg på Facebook.
I innlegget skriv han at sentralstyret i NSF «merkeleg nok» skulle gjere vedtaket om kven som skulle vere offisiell norsk søkjarby, og at Magnus Carlsen ikkje var ein formell høyringspart.
Magnus Carlsen skal forsvare VM-tittelen sin hausten 2020.
Men Henrik Carlsen meiner det er ei for stor belastning for Magnus å spele VM-kamp heime i Noreg, men langt frå sitt heimemiljø.
– Eksponering og høge forventningar
– Magnus har sjølvsagt ingenting imot Stavanger som by eller som sjakkarrangør generelt, skriv Henrik Carlsen.
– Å spele VM på heimebane er på den eine side ein heilt unik draum som kan gå i oppfylling ein eller annan gong. Men det er også ei sportsleg ulempe på grunn av meir eksponering og trykk frå høge forventningar. Magnus opplever at full heimebane i Oslo og nær Bærum derhan har budd i store deler av livet kunne kompensere for ein del av denne ulempa, skriv Carlsen.
Sidan i fjor haust har Stavanger samla inn nærmare 30 millionar kroner frå sponsorar og offentlege midlar frå fylke og kommunen til arbeide med å få VM til Stavanger.
– Det meste av tida har vi jobba utan løn, så vi har ikkje brukt enormt med pengar. Men sjølvsagt har vi brukt ressursar – og penger også. Vi har brukt enorme mengder med timar, og vi har henta inn mykje penger, seier Madland.
Han meiner dei ikkje kunne ha gjort så mykje annleis.
– Med fasit i hand ville vi ikkje lagt ned ein time i dette, men no er det slik at det alltid er enkelt med fasiten.
– Burde de ha sondert terrenget med Carlsen tidlegare?
– Eg meiner vi har gjort alt vi kunne i denne saka. Vi har vore opne, og alle har kjent til at vi har jobba med saka.
Sjakkpresidenten tek sjølvkritikk
SJØLVKRITIKK: - Kanskje burde vi lytta meir til Magnus' behov, seier sjakkpresident Morten Madsen
Foto: Terje Bendiksby / NTB scanpixSjakkpresident Morten Madsen meiner utspelet er ryddig, og tek litt sjølvkritikk for prosessen då Stavanger blei vald.
– Det er eit ryddig utspel frå Henrik, basert på at det er krevjande for Magnus å spele eit VM på heimebane i Noreg. Det har vi sett tidlegare under Norway-Chess og turneringar han har hatt i heimlandet. Så har det vore ei ekstra belastning for han å klare å maksimere prestasjonen sin. Det verkar som han spelar lettare når han er i utlandet, seier Morten Madsen til NRK.
Han forklarer valet av Stavanger.
– Vi tok ei avgjerd basert på mange variablar, mellom anna vurderte vi kva for søkjarby som kunne stå seg best mot den internasjonale konkurransen, mot for eksempel konserthuset i Wien og Austerrike sitt kandidatur. Og Stavanger var det alternativet som vi meinte var best sportsleg og økonomisk.
– Så kan ein i ettertid, etter å ha fått litt meir innsikt i kva som var den eigentlege grunnen til Magnus, ta litt sjølvkritikk på at vi burde lytta meir til med tanke på hans behov. Men det var ein vanskeleg situasjon, og vi beslutta det vi gjorde. Henrik og dei har også litt forståing for det, samstundes som dei veit at det ikkje var så enkelt.
