– Byrjar du å bli klar? Du må få på skoa! kommanderer Gjert Ingebrigtsen i det NRK skal til å innleie intervjuet med Narve Gilje Nordås.
Mellomdistanseløparen har akkurat vunne 3000-meteren under Trond Mohn Games i suveren stil, og får overtalt trenaren om at det er tid til nokre spørsmål før han skal jogge ned.
TRENAR: Gjert Ingebrigtsen.
Foto: NTB– Eg må ta av piggskoa, så vi kan slå to fluger i éin smekk, argumenterer han før vi får lurt inn det første spørsmålet.
Nordås har aldri vore i betre form. I februar sette han norsk rekord innandørs på 3000 meter med tida 7.45,39. I slutten av mai senka han personleg beste på 1500 meter til 3.34,70.
– Eg må jekkast ned
Akkurat no verkar det berre å vere Jakob Ingebrigtsen som er betre enn han på distansen i Noreg. Derfor struttar Nordås av sjølvtillit for tida.
– Sjølvtilliten er for høg no, merkar eg. Eg må bli jekka ned. Eg må snakke med Gjert, så tek vi oss av det. Få meg ned på jorda, men samtidig bevare gleda, gliser 24-åringen, som kort tid i førevegen hadde starta jubelen lenge før målgang.
MÅLGANG: Nordås starta feiringa tidleg på oppløpet og gav publikum ein ekstra takk då han kryssa målstreken.
Foto: NTB«Ting går på skjener», beskriv han, og forklarer at eit ekstra år med trening har gjort godt. Han har fått trena mykje i høgda, auka mengda, og gjort nokre små, men viktige justeringar.
– Eg har stramma alle skruar som går an, og vore seriøs kvart einaste sekund heile døgnet. Eg har lagt opp livet etter kvar treningsøkt i større grad enn nokosinne. Då får ein resultat, forklarer løparesset.
Gjert Ingebrigtsen stadfestar at det ikkje er noko i vegen med sjølvtilliten til eleven.
– Og den har stigande kurve, presiserer han.
– Ingen i verda som skremmer meg
Kontrastane til førre sesongs VM i Eugene i USA kunne knapt vore større. Sjølvtilliten var fullstendig fråverande, og både trenar og elev verka usikre på korleis dei skulle få snudd det. Den rå mentaliteten Gjert var vand med hos sønene, fanst ikkje i Nordås.
– Eg har ikkje så mykje her å gjere, sa han sjølv om eiga VM-deltaking den gongen.
No har pipa fått ein annan lyd.
– Det er ingen tvil om at eg skal til VM, seier han til NRK i dag.
– Har det skjedd ei endring mentalt?
– Ja, «ka fanken». No er det berre å møte opp. Eg er mykje betre rusta til å stille opp i eit VM på 1500 eller 5000 meter no, både fysisk og mentalt. Sjølvtilliten er der han skal vere. Det er ingen felt i verda som skremmer meg. Det er berre å leggje seg på halen og vere med så lenge ein klarer, så får vi sjå kva det held til, seier Nordås.
Heller ikkje trenar Ingebrigtsen kjenner igjen 24-åringen.
– Det har skjedd ei radikal endring, både fysisk og på alle moglege vis. Det ser ein på han, ein ser på heile framtoningen at han koser seg når han spring løp. I staden for at det er pyton, synest han det er fantastisk,, seier han.
Klar for eit høgare nivå
Kommande laurdag spring Nordås 1500 meter under eit solid stemne i Paris. Deretter ventar Diamond League og Bislett Games på heimebane for formløparen. Det er heller ingen tvil om at han skal til VM. Ein meir passande arena, meiner trenar Ingebrigtsen.
– Han er eigentleg klar for eit høgare nivå, seier han.
Gjert Ingebrigtsen spår at sesongen til Nordås kan bli «veldig, veldig bra». Han meiner suksessformelen for det nye tilværet til eleven er enkel:
– Å vinne løp. Om det går fort eller seint, men det å vinne løp er ein veldig bra eigenskap. For det gir ein veldig tryggleik.
Du kan sjå Narve Gilje Nordås i Diamond League frå Oslo på NRK. Friidretts-VM blir sendt same stad i august.
